Maynila – Mariing pinabulaanan ni dating Congressman Harry Angping ang mga alegasyong siya ay may kinalaman sa kaguluhan na naganap sa Mendiola noong Setyembre 21, 2025, kung saan daan-daang demonstrador at pulis ang nasangkot sa karahasan.

Lumabas ang pangalan ni Angping, kasama ng ilang personalidad kabilang sina Vic Rodriguez, Ferdinand Topacio, at negosyanteng si Bernie Ang, sa mga ulat na nag-uugnay umano sa kanila bilang posibleng mga financier o nasa likod ng riot. Gayunpaman, iginiit ni Angping na wala siyang partisipasyon sa naturang insidente at tinawag na walang basehan ang naturang paratang.

Ayon sa mga ulat, nagsimula ang kaguluhan sa harap ng Mendiola Peace Arch matapos umanong mauwi sa gulo ang isang anti-corruption rally. Naiulat na 129 pulis at 76 sibilyan ang nasugatan sa insidente, kung saan nagkaroon ng batuhan ng bato at bote, at tinangkang gibain ang mga harang na nagbabantay sa lugar.

Mariing itinanggi ng mga pinangalanang personalidad ang kanilang pagkakasangkot, at kinondena ang mga paratang bilang bahagi umano ng “psywar” at maling impormasyon na ipinapakalat upang sirain ang kanilang pangalan.

Sa ngayon, nagpapatuloy ang imbestigasyon ng mga awtoridad hinggil sa totoong sanhi at mga posibleng nasa likod ng riot. Wala pang inilalabas na opisyal na kaso laban kay Angping o sa iba pang personalidad na pinangalanan.

larawan/ google