LEGAZPI CITY — Hindi bababa sa 14 katao ang nasawi habang libo-libo ang napilitang lumikas sa kanilang mga tahanan matapos ang pananalasa ng Bagyong Opong sa mga rehiyon ng Bicol at Visayas, ayon sa ulat ng Office of Civil Defense (OCD) at mga lokal na disaster risk reduction offices nitong Biyernes.

Sa Bicol Region, apat ang naiulat na nasawi: isang residente sa Mercedes, Camarines Norte na tinamaan ng kidlat; isang taga-Monreal, Masbate na nadaganan ng puno; isang lalaki sa Masbate City na natabunan ng gumuhong pader; at isa pa sa Mobo, Masbate na tinamaan ng debris. Sa Central Luzon, isang babae at isang walong taong gulang na bata ang namatay sa Morong, Bataan matapos madaganan ng punong bumagsak sa kanilang bahay habang natutulog.

Pinakamarami ang nasawi sa Biliran province sa Eastern Visayas, kung saan pito ang naiulat na patay. Kabilang dito ang isang 68-anyos na lalaki sa Caibiran na nalunod sa baha; isang lolo at dalawa niyang apo (edad 4 at 12) na nalunod sa flash flood sa Barangay Bilwang, Kawayan; at tatlong residente ng Maripipi Island na nasawi sa isang buhawi. Isa pang batang babae (edad 7) ang nawawala.

Ayon sa OCD, mahigit 318,000 indibidwal ang naapektuhan sa Bicol pa lamang, habang patuloy pang tumataas ang bilang sa Visayas. Sa Masbate, tinatayang 26,000 katao mula sa 8,604 pamilya ang lumikas sa evacuation centers. “Massive destruction was left behind—damaged houses, agricultural lands, toppled power lines and blocked roads,” ayon kay Masbate provincial disaster chief Gerald Palacio. Dagdag pa niya, “We urgently need food, nonfood items, shelter materials and clean water.”

Tatlong landfall ang ginawa ni Opong sa loob ng 12 oras: sa San Policarpo, Eastern Samar bago maghatinggabi ng Huwebes; sa Palanas, Masbate ng alas-4 ng umaga ng Biyernes; at sa Mansalay, Oriental Mindoro ng alas-11:30 ng umaga. Nagdulot ito ng malawakang pagbaha, landslide, pagkasira ng mga kalsada, at pagkawala ng kuryente sa maraming lalawigan.

Patuloy ang relief operations ng mga lokal na pamahalaan, habang naka-alerto ang National Disaster Risk Reduction and Management Council (NDRRMC) para sa posibleng dagdag na pinsala. Inatasan na rin ni Pangulong Ferdinand Marcos Jr. ang mga ahensya ng gobyerno na magpatupad ng “full disaster response” sa mga apektadong lugar.

Larawan mula kay Engr. Jerome Martinez