DAVAO CITY — Naantala ang isang flight sa Davao International Airport matapos arestuhin ang isang pasahero na nagbiro tungkol sa bomba habang nasa proseso ng check-in, ayon sa awtoridad.

Ayon sa Davao International Airport Police Station (DIAPS), nang tanungin ng airline personnel ang pasahero tungkol sa kanyang dala, pabirong sinabi nito: “Wala namang power bank dito, time bomb lang, miss.” Ang pahayag na ito ay agad ikinabahala ng mga tauhan ng paliparan.

Dahil sa naturang biro, agarang ipinatupad ng Aviation Security Explosives and Ordnance Disposal (EOD) at ng Canine Unit ng AVSECU 11 ang standard safety protocol upang masiguro ang kaligtasan ng lahat ng pasahero at ng eroplano. Kasama rito ang inspeksyon sa buong terminal at pagtiyak na walang banta sa paligid.

Ang pasaherong nagbiro ay in-offload at kasalukuyang nasa kustodiya ng DIAPS. Kakaharapin niya ang kaso sa ilalim ng Presidential Decree 1727 o Anti-Bomb Joke Law, na may parusang hanggang limang taon na pagkakakulong o multa na aabot sa P40,000, o parehong parusa.

Ayon sa mga awtoridad, ang mahigpit na pagpapatupad ng batas ay bahagi ng kanilang patuloy na kampanya para sa kaligtasan ng mga pasahero at personnel ng paliparan. Ipinapaalala rin nila na ang anumang biro tungkol sa bomba ay seryosong isyu na maaaring magdulot ng panic at operational disruption.

Pinapayuhan ng DIAPS ang publiko na maging maingat sa kanilang mga pahayag sa loob ng paliparan at unawain na ang mga biro ukol sa bomba ay may legal at operational na kaparusahan. Tiniyak ng awtoridad na patuloy nilang isusulong ang seguridad at kaligtasan sa lahat ng flights at terminal.

Larawan mula sa CAA