OKTUBRE 31, 2025 — Nag-init ang umaga sa Marikina nitong Oktubre 28 matapos magkasagutan at magkasuntukan ang isang motorista at siklista sa kahabaan ng Gil Fernando Avenue, Barangay Sto. Niño — isang insidenteng agad naging viral online.

Ayon sa ulat ng pulisya, nagsimula ang tensyon bandang 8:30 a.m. nang lumipat sa gitnang lane ang siklistang si Enrico Paulo Turya, 40, para iwasan ang baha. Hindi ito nagustuhan ng driver ng puting sedan na si Lord Wally Miranda Pangan, 41, kaya’t bumusina ito nang malakas. 

Hindi naman ito pinalampas ni Turya — hinabol niya ang sasakyan, hinarangan gamit ang bisikleta, at doon na nagsimula ang mainit na palitan ng suntok.

Nagkaroon pa ng karagdagang aksyon matapos subukang umalis ng siklista. Hinabol siya ng driver at nauwi sa literal na agawan ng bike sa gitna ng kalsada. Sa harap ng mga usisero, nagkapulasan ng lakas ang dalawa habang parehong ayaw bumitaw sa bisikleta.

Isang delivery rider ang nakakita sa gulo at agad humingi ng tulong sa mga pulis na nagpapatrolya sa lugar. Pagdating ng mga awtoridad, nadatnan nila ang dalawang lalaki sa harap ng Suzuki Motors sa Gil Puyat, parehong galit at handang magsampa ng reklamo.

Bagamat walang nasira sa sasakyan at bisikleta, tumagal ng halos kalahating oras ang tensyon bago pumayag ang dalawang panig na ayusin ang gusot sa presinto. Sa huli, nagdesisyon silang huwag nang ituloy ang reklamo at magkaayos na lang.

Paalala ng Eastern Police District, simple lang ang ugat ng gulo — isang pagbusina na nauwi sa init ng ulo. 

Sa panahon ng trapik at init ng araw, simple lang ang paulit-ulit na paalala ng mga awtoridad: habaan ang pasensya. 

(Larawan: YouTube)