MANILA — The Bangko Sentral ng Pilipinas (BSP) muling nanawagan sa publiko na magbigay ng “e-aguinaldo” o digital na pamasko ngayong Kapaskuhan, kasabay ng pagtiyak na may sapat na suplay ng bagong banknotes at coins sa mga bangko sa buong bansa.

Sa inilabas na advisory, sinabi ng BSP na mas ligtas at mas maginhawa ang paggamit ng e-wallets at online banking sa pagpapadala ng pamasko sa mga inaanak, pamilya, at kaibigan. 

“The BSP also encourages the public to use digital or e-money as cash gifts to their godchildren, family, and friends. Using e-wallets and online banking offers a safer and more convenient way to send cash gifts during the Christmas season,” ayon sa pahayag ng central bank.

Gayunman, nilinaw ng BSP na patuloy pa rin ang produksyon ng bagong banknotes at coins upang tugunan ang inaasahang pagtaas ng demand sa pisikal na pera ngayong holiday season. 

“The BSP continues to produce fresh banknotes and coins to make these available in banks in anticipation of the expected surge in currency demand during the Yule,” dagdag ng ahensya.

Bukod sa digital na pamasko, pinaalalahanan din ng BSP ang publiko na libre ang pagpapalit ng unfit banknotes sa mga bangko at dapat lamang makipagtransaksyon sa mga awtorisadong institusyon upang maiwasan ang mga singil na ipinapataw ng hindi awtorisadong partido.

Sa mga nakaraang taon, paulit-ulit nang hinihikayat ng BSP ang paggamit ng digital payments bilang alternatibo sa tradisyunal na pamasko. Ayon sa ahensya, nakatutulong ito hindi lamang sa kaginhawaan ng mga nagpapadala at tumatanggap ng pamasko, kundi pati na rin sa pagpapalakas ng digital economy ng bansa.

Sa kabila ng patuloy na produksyon ng pisikal na pera, binigyang-diin ng BSP na ang paggamit ng e-aguinaldo ay makapagpapababa ng pangangailangan sa maliliit na denominasyon at sobre, at makapagbibigay ng mas mabilis na paraan ng pagbibigay ng pamasko.

Ang panawagan ng BSP ay nakikita bilang bahagi ng mas malawak na kampanya ng pamahalaan upang isulong ang digitalization ng financial transactions sa Pilipinas, lalo na ngayong panahon ng Kapaskuhan kung saan tumataas ang sirkulasyon ng pera at pamasko.