May 22 - Iga Swiatek, na tatlong sunod na taon nang naghari sa Roland Garros, ay papasok ngayong taon sa French Open na may mabigat na pasan—mula sa kabiguang personal hanggang sa pagbaba ng kumpiyansa at ranggo.

Bumagsak si Swiatek sa ikalimang puwesto ng WTA rankings ngayong linggo, ang kanyang pinakamababang posisyon mula noong 2020, at unang beses na wala sa top 2 matapos ang 173 linggong sunod-sunod na presensya. Nangangahulugan ito ng mas mahirap na draw sa pag-asang makuha ang ika-limang French Open title sa loob ng anim na taon.

Matapos ang kabiguan sa third round ng Rome laban kay Danielle Collins at ang 6-1, 6-1 na pagkatalo sa semifinal ng Madrid kay Coco Gauff, wala pa ring naiuwing titulo si Swiatek ngayong 2025, bagama’t regular siyang umaabot sa quarterfinals o mas mataas.

Ngunit higit pa sa performance sa court ang kanyang iniinda. Matapos ang hindi inaasahang pagkawala sa Asian swing noong 2024, kinumpirma kalaunan na siya’y na-ban ng isang buwan dahil sa pagpositibo sa trimetazidine, isang banned substance. Giit ni Swiatek, ito ay mula sa isang over-the-counter na gamot para sa pagtulog at hindi sinadyang doping.

Tinawag niya itong “pinakamasamang karanasan ng buhay ko,” at nagdulot ito ng matinding anxiety. Mula noon, tila sunod-sunod ang pagsubok—mula sa criticism sa pagpasaring sa ball boy sa Indian Wells, harassment sa Miami, emosyonal na breakdown sa Madrid at Rome, hanggang sa pagkamatay ng kanyang lolo bago ang Madrid Open.

Patuloy din ang agam-agam sa epekto ng kanyang bagong coach na si Wim Fissette, bagama’t iginiit niyang hindi ito ang sanhi ng kanyang pagkabigo. Sa kabila ng suporta ng kanyang sports psychologist na si Daria Abramowicz, inamin ni Swiatek: “Naguguluhan ako.”

Ayon kay Justine Henin, kapwa four-time French Open champion, maaaring ito na ang pagbagsak ni Swiatek sa Roland Garros: “She’s in a vicious circle... You’d think it would be here where she’ll finally sink before perhaps getting back on track.”

Gayunman, para kay Coco Gauff, huwag maliitin ang isang reyna ng Paris. “If someone wins a tournament that many times, they can definitely figure out a way to win again,” aniya.