July 10 - Ginawang inspirasyon ni Chris Ross ang kanyang pagkakabangko sa Game 6 upang ibalik ang San Miguel Beermen sa finals ng PBA Philippine Cup matapos ang 100-93 Game 7 win laban sa Barangay Ginebra.

Aminado ang 39-anyos na beterano na nasaktan siya sa desisyon ni Coach Leo Austria na hindi siya ipasok noong nakaraang laro—lalo na't naipanalo ito ng Ginebra sa pamamagitan ng game-winning three ni LA Tenorio.

“Nasaktan talaga ako. Competitor ako. Pero sinabi ko kay coach, winner ako. Gusto ko lang manalo kahit paano man 'yan mangyari. Wala nang ibang mas nagko-compete sa akin,” pahayag ni Ross.

Humingi ng paumanhin si Austria matapos ang insidente:
“I approached him and I told him I’m so sorry for what happened. I was so guilty at that time. Pero alam natin si Chris Ross, playoff player talaga ‘yan.”

At pinatunayan nga ito ni Ross sa Game 7—nanguna siya sa ikalawang half, kung saan binura ng Beermen ang 10-point deficit mula 60-70 sa third quarter.

Nagtala si Ross ng 12 puntos, 7 assists, 3 rebounds at 4 steals sa do-or-die match.

“Nakita natin 'yung impact niya. Gusto niya talagang manalo. Nahawa pati buong team,” ani Austria.

Maliban sa hangad na manalo, motibasyon din ni Ross ang patunayan na kaya pa rin niyang makipagsabayan.

“Alam kong meron pa rin ako. Nararamdaman kong healthiest ako ngayon. Hindi ko sinasadyang patunayan na mali ang iba, pero ginagampanan ko lang trabaho ko,” aniya.

“Pakiramdam ko, sa huling 10 taon, sina Jayson, LA at ako ang top point guards. Di ako madalas makuha ng recognition pero sa tingin ko, patas lang mga nagawa ko.”