Isang makasaysayang hakbang sa mundo ng robotics ang inilunsad kamakailan ng UBTECH, isang kumpanyang mula sa China, sa pagpapakilala ng Walker S2 — ang kauna-unahang humanoid robot sa buong mundo na kayang magpalit ng sariling baterya.

May taas na 5 talampakan at 3 pulgada at may 20 flexible joints o kasukasuan, ang Walker S2 ay idinisenyo para sa mga pabrika at pampublikong espasyo. Ngunit ang tunay na pambihirang kakayahan nito ay ang abilidad nitong palitan ang sariling baterya sa loob lamang ng tatlong minuto, na nagbibigay-daan para sa tuluy-tuloy na 24/7 na operasyon nang walang pangangailangan ng tao.

Ayon sa mga eksperto, ito ay isang malaking hakbang patungo sa mas matalino at fully autonomous na serbisyo ng mga robot sa iba’t ibang larangan — mula sa industriya hanggang sa serbisyo publiko. Sa halip na umasa sa pagre-recharge o tulong mula sa teknisyan, kayang-kaya na nitong alagaan ang sarili nitong enerhiya, isang bagay na dati ay bahagi lamang ng science fiction.

Inaasahang magiging malaking bahagi ang Walker S2 sa hinaharap ng automation, partikular sa mga lugar kung saan kailangan ng tuloy-tuloy at episyenteng serbisyo, gaya ng logistics, manufacturing, at customer assistance.

Habang patuloy na lumalawak ang kakayahan ng artificial intelligence at robotics, nananatiling tanong ng ilan ang epekto nito sa mga manggagawa. Ngunit para sa UBTECH, layunin nilang maging katuwang ng tao ang mga robot — hindi kapalit.

Ang Walker S2 ay isa lamang sa mga inaabangang development sa mundo ng makabagong teknolohiya, at patuloy nitong binubura ang hangganan sa pagitan ng makina at talinong pantao.

(Source of News: China Daily HK)

(Larawan: Screen grab from China Daily HK)