Manila — Opisyal nang inilunsad ng Apple ang iPhone 17 series sa bansa, kabilang ang apat na modelo: iPhone 17, iPhone 17 Air, iPhone 17 Pro, at iPhone 17 Pro Max. Inanunsiyo ng kompanya ang global release noong Setyembre 9, 2025, kasunod ang pagbubukas ng pre-order noong Setyembre 12. Sa Pilipinas, magsisimula ang availability ng mga bagong unit sa mga Apple Authorized Resellers at online stores bago matapos ang buwan.

Ayon sa Apple at mga lokal na distributor, nagsisimula sa ₱57,990 ang presyo ng iPhone 17 na may 256GB storage, habang ang pinakamataas na variant, ang iPhone 17 Pro Max na may 512GB storage, ay umaabot sa ₱101,990. Ang iPhone 17 Air, na itinuturing na pinakam manipis na iPhone sa kasaysayan, ay nakapresyo mula ₱72,990.

Kabilang sa mga pangunahing tampok ng bagong serye ang ProMotion display na may 120Hz refresh rate para sa lahat ng modelo, mas maliwanag na screen na umaabot sa 3,000 nits, at mas malakas na baterya na kayang tumagal ng hanggang 30 oras ng video playback sa standard unit at 39 oras sa Pro Max.

Para sa performance, naka-install ang bagong A19 chip sa iPhone 17, habang ang Air, Pro, at Pro Max ay gumagamit ng mas mataas na bersyong A19 Pro na may vapor chamber cooling system para mabawasan ang sobrang init sa paggamit. Sa kamera, may dual 48-megapixel system ang base model, samantalang mas advanced na lente at mas mataas na resolution ang nakapaloob sa Pro variants.

Bukod dito, nakahanda ang iPhone 17 series para sa mas mabilis na koneksiyon gamit ang Wi-Fi 7 at pinahusay na Bluetooth. Inaasahan ding unti-unting ipatutupad ang paggamit ng eSIM-only models sa piling merkado, kabilang na ang ilang bahagi ng Asya.

Sa kabila ng mas mataas na presyo, inaasahang magiging mataas ang demand para sa bagong iPhone series sa Pilipinas, lalo na’t madalas na kabilang ang bansa sa mga merkadong mabilis tumanggap ng pinakabagong teknolohiya ng Apple.