Nobyembre 22, 2025 - Isang makabagong rapid testing kit para sa African Swine Fever (ASF) ang dinebelop ng Filipino innovator na si John Paulo Jose mula sa Department of Science and Technology – Industrial Technology Development Institute (DOST-ITDI). 

Ang kit na tinawag na Tuslob Rapid DNA Extraction Kit ay idinisenyo upang gawing mas mabilis, mas simple, at mas mura ang proseso ng pagtukoy ng ASF sa mga baboy.

Ayon sa ulat ng GMA Integrated News, ang Tuslob kit ay gumagamit ng tatlong madaling hakbang na tinawag na “Dip, Detect, Done.” Sa pamamagitan nito, ang karaniwang 2 hanggang 3 araw na proseso ng pagsusuri ay nababawasan sa loob lamang ng ilang oras. 

“Usually, from submission of sample to releasing the result, it takes 2 to 3 days… We developed a dip stick that can capture DNA without any use of equipment,” paliwanag ni Jose.

Ang teknolohiyang ito ay malaking tulong sa mga hog raisers at sa Department of Agriculture (DA) dahil nagbibigay ito ng mabilis na paraan upang matukoy ang presensya ng ASF virus bago pa lumala ang impeksiyon. 

Simula nang pumasok ang ASF sa Pilipinas noong 2019, tinatayang 76 na probinsya na ang naapektuhan, na nagdulot ng bilyon-bilyong pisong pagkalugi sa industriya ng baboy.

Bukod sa Tuslob kit, ipinakilala rin ng DOST ang VIPtec ASFV qPCR Detection Kit, na nagbibigay ng mas detalyadong pagsusuri gamit ang molecular diagnostics. Ang dalawang kit na ito ay produkto ng kolaborasyon ng DOST-ITDI, Philippine Council for Agriculture, Aquatic and Natural Resources Research and Development (PCAARRD), at pribadong research firm na BioAssets Corporation.

Ayon sa DOST, ang mga locally-developed kits ay hindi lamang makakatulong sa mabilis na pagtukoy ng ASF kundi makakapagbigay rin ng mas murang alternatibo kumpara sa imported testing kits. 

Layunin ng ahensya na gawing available ang mga ito sa mga lokal na pamahalaan at hog raisers sa buong bansa upang mapalakas ang biosecurity measures at maiwasan ang pagkalat ng ASF.

Ang innovation na ito ay nakikita bilang isang “game changer” sa laban kontra ASF, na patuloy na banta sa food security ng Pilipinas. Sa pamamagitan ng mabilis na detection, mas maagang makakagawa ng hakbang ang mga awtoridad upang pigilan ang pagkalat ng sakit at protektahan ang kabuhayan ng libu-libong hog farmers.

Larawan mula DOST