PARIS — Nagagamit na ngayon ang artificial intelligence (AI) sa mga fertility clinic upang makatulong sa pagpili ng pinakamahusay na embryo para sa in vitro fertilization (IVF). Nakikitang makapagpapataas ito ng tagumpay ng mga proseso ngunit may kaakibat ding mga etikal na pangamba.

Ayon kay Nathalie Massin, head ng clinical unit ng IVF center sa American Hospital of Paris, “Artificial intelligence is here to help us select better embryos or at least help determine their potential for implantation.” 

Binanggit niya na nakatutulong ang AI sa mga embryologist na bawasan ang subjective decision-making at gawing mas standardized ang proseso ng pagpili ng embryo.

Gumagamit ang mga fertility clinic ng deep learning algorithms at time-lapse imaging upang masuri ang kalidad ng embryo, na nagreresulta sa mas mataas na accuracy rate kumpara sa tradisyunal na manual assessment. 

Sa ilang pag-aaral, ipinakita na ang AI ay nakapagpapabuti ng embryo selection accuracy ng hanggang 30 porsyento, na nagreresulta sa mas mataas na implantation success.

Gayunman, binigyang-diin ng mga eksperto na may mga etikal na tanong na kaakibat ng paggamit ng AI sa IVF. Kabilang dito ang pangamba sa diskriminasyon sa pagpili ng embryo batay sa genetic traits at ang posibilidad ng paggamit ng teknolohiya para sa tinatawag na “designer babies.” 

Nanawagan ang mga eksperto ng mas malinaw na regulasyon upang matiyak na ang AI ay ginagamit lamang para sa medical purposes at hindi sa komersyal na interes.

Halos limampung taon matapos ipanganak ang unang IVF baby, nakikita ang AI bilang susunod na malaking hakbang sa reproductive medicine. Bagama’t may mga pangamba, naniniwala ang mga eksperto na ang tamang paggamit ng teknolohiya ay makatutulong sa mas maraming mag-asawa na makamit ang kanilang pangarap na magkaroon ng anak.