ISABEL, March 20, 2025 — Hindi na nangangailangan si Pope Francis ng mechanical ventilation para tulungan siyang huminga sa gabi, ayon sa pahayag ng Vatican nitong Miyerkules. Nanatiling positibo ang pananaw ng mga doktor hinggil sa kanyang paggaling.

Ang 88-anyos na Santo Papa, na kasalukuyang nakikipaglaban sa pulmonya, ay halos limang linggo nang nananatili sa Gemelli Hospital sa Roma dahil sa malubhang impeksyon sa respiratory system na nangangailangan ng iba’t ibang uri ng gamutan.

"Patuloy na bumubuti ang kalagayan ng Santo Papa," ayon sa pinakabagong ulat medikal.

Habang naka-confine, ginamit ni Francis ang non-invasive mechanical ventilation tuwing gabi — isang maskarang tumutulong magpasok ng hangin sa kanyang baga. Ngunit inanunsyo ng Vatican na itinigil na ang ganitong uri ng suporta, bagaman nakakatanggap pa rin siya ng oxygen sa pamamagitan ng nasal tube.

Naniniwala ang mga doktor na kontrolado na ang kanyang impeksyon, lalo na’t bumaba na ang kanyang lagnat at normal na rin ang resulta ng kanyang mga blood test.

Bagamat dalawang linggo nang matatag o patuloy na bumubuti ang kanyang kondisyon, hindi pa nagbibigay ng eksaktong petsa ang Vatican para sa kanyang paglabas ng ospital, binigyang-diin ang pangangailangan ng maingat at unti-unting paggaling.

Ang pagiging vulnerable ni Pope Francis sa mga impeksyon sa baga ay nag-ugat sa kanyang kabataan, kung saan sumailalim siya sa operasyon para alisin ang bahagi ng kanyang baga dahil sa pleurisy.

Sa kasalukuyan, sumasailalim ang Santo Papa sa respiratory physiotherapy upang tulungan siyang makahinga nang mas maayos, at physical therapy upang mapabuti ang kanyang pagkilos. Sa mga nagdaang taon, madalas na rin siyang gumamit ng wheelchair dahil sa pananakit ng tuhod at likod.

Ayon sa ilang eksperto sa medisina na hindi direktang sangkot sa kanyang pangangalaga, maaaring maging mahaba at hamon ang kanyang paggaling dahil sa kanyang edad at iba pang kondisyon sa kalusugan.

Ito na ang pinakamahabang panahong hindi nakita sa publiko si Pope Francis mula nang maging Santo Papa siya noong 2013. Nitong Linggo, inilabas ng Vatican ang unang larawan niya sa ospital, kung saan makikitang siya ay taimtim na nananalangin sa isang chapel.

Sa isang positibong senyales, inanunsyo ng Hari at Reyna ng Britanya — sina King Charles at Queen Camilla — ang kanilang planong bumisita sa Italya at Vatican sa unang bahagi ng Abril. Ipinapahiwatig nito ang pag-asang makakauwi na si Francis bago matapos ang buwan. Nakaiskedyul silang makipagkita sa Santo Papa sa Abril 8, ayon sa koordinasyon ng mga senior Vatican officials.

Samantala, patuloy pa rin ang pagdating ng mga mensahe ng pagmamahal at panalangin mula sa iba’t ibang panig ng mundo, kabilang ang mga liham mula sa mga bata. Ayon sa postal service ng Italya, nakakatanggap ang Santo Papa ng dagdag na 150 kilo (331 pounds) ng sulat araw-araw mula nang siya’y maospital. Upang mapamahalaan ito, nagpapadala ang ospital ng isang van araw-araw para kunin ang mga liham na nakapangalan sa kanya.

Image: uzhursky/Canva