HUNYO 22, 2025 — Inilunsad ng United States ang targeted na atake sa tatlong nuclear facility ng Iran, kasama ang matibay na Fordo site, na nagdulot ng matinding reaksyon mula sa mga lider ng mundo. May pumuri sa hakbang, habang may nagbabala naman ng malalang epekto.

Idineklara ni President Donald Trump na tagumpay ang operasyon, at sa Truth Social ay sinabi niyang: “This is an HISTORIC MOMENT FOR THE UNITED STATES OF AMERICA, ISRAEL, AND THE WORLD. IRAN MUST NOW AGREE TO END THIS WAR.”

(Isang makasaysayang sandali ito para sa U.S., Israel, at sa buong mundo. Dapat na sumang-ayon ang Iran na wakasan ang digmaang ito.)

Sumang-ayon ang Israel, habang nagbabala ang U.N. ng gulo.

Mabilis na pumuri si Israeli Prime Minister Benjamin Netanyahu, at tinawag itong turning point.

“President Trump and I often say: ‘Peace through strength.’ First comes strength, then comes peace. And tonight, Donald Trump and the United States acted with a lot of strength,” sabi niya.

(Lagi naming sinasabi ni President Trump: 'Kapayapaan sa pamamagitan ng lakas.' Una ang lakas, saka ang kapayapaan. At ngayong gabi, ipinakita ni Donald Trump at ng U.S. ang kanilang lakas.)

Dagdag pa niya, “History will record that President Trump acted to deny the world's most dangerous regime the world's most dangerous weapons.”

(Itatala ng kasaysayan na kumilos si Pangulong Trump para pigilan ang pinakadelikadong rehimen sa mundo na magkaroon ng pinakamapanganib na armas.)

Kumondena naman si United Nations Secretary-General António Guterres, na nagsabing nasa bingit ng sakuna ang rehiyon.

“There is a growing risk that this conflict could rapidly get out of control – with catastrophic consequences for civilians, the region, and the world,” dagdag niya.

(Lumalaki ang panganib na mawalan ng kontrol ang labanang ito - at magdulot ng malawakang pinsala sa mga sibilyan, sa rehiyon, at sa buong mundo.)

Nagbanta naman ng ganti ang Iran, habang kumondena ang mga kaalyado nito.

Tinawag ni Iranian Foreign Minister Abbas Araghchi na malinaw na paglabag sa batas ang atake.

“The events this morning are outrageous and will have everlasting consequences,” sulat niya sa X.

(Ang mga pangyayari kaninang umaga ay kasuklam-suklam at magkakaroon ng walang hanggang epekto.)

Hiniling ng maraming bansa ang de-escalation.

Binigyang-diin ng Mexico ang pangangailangan ng dayalogo: “The restoration of peaceful coexistence among the states of the region is the highest priority.”

(Ang pagpapanumbalik ng mapayapang pagsasama ng mga bansa sa rehiyon ang pinakamahalaga.)

Nagbabala si New Zealand Foreign Minister Winston Peters: “Ongoing military action in the Middle East is extremely worrying ... Diplomacy will deliver a more enduring resolution than further military action.”

(Nakakabahala ang patuloy na labanan sa Middle East ... Mas makakamit ang pangmatagalang solusyon sa pamamagitan ng diplomasya kaysa sa karahasan.)

Sa ngayon, habang umiigting pa ang tensyon, naghahanda ang mundo sa susunod na hakbang ng Iran — at kung may pag-asa pang pigilan ng diplomasya ang mas malawak na digmaan.

(Larawan: Yahoo)