DISYEMBRE 19, 2025 — Nakahanap ng paraan ang TikTok upang manatili sa operasyon sa pinakamalaking merkado nito — ang Estados Unidos. Kinumpirma ng kumpanya na pumirma ito ng kasunduan sa mga pangunahing mamumuhunan para sa pagtatatag ng bagong joint venture na nakabase sa Amerika.

Ayon sa isang internal memo na nakuha ng Bloomberg at Axios, ipinaliwanag ni TikTok CEO Shou Chew sa mga empleyado na pumayag ang ByteDance, ang parent company mula Tsina, sa bagong estruktura kasama ang Oracle, Silver Lake, at Abu Dhabi-based MGX bilang malalaking kasosyo. 

“Upon the closing, the US joint venture ... will operate as an independent entity with authority over US data protection, algorithm security, content moderation and software assurance,” ani Chew. 

(Sa pagsasara ng kasunduan, ang US joint venture ... ay kikilos bilang isang independiyenteng entidad na may awtoridad sa proteksyon ng datos, seguridad ng algorithm, moderasyon ng nilalaman at katiyakan ng software.)

Sa ilalim ng bagong ayos, isang-katlo ng venture ay hawak ng mga kasalukuyang mamumuhunan ng ByteDance, habang halos 20 porsiyento ay mananatili sa ByteDance mismo — ang pinakamataas na porsiyentong pinapayagan para sa isang kompanyang Tsino ayon sa umiiral na batas.

Ang hakbang na ito ay tugon sa batas na ipinasa sa ilalim ng administrasyong Biden, na nag-aatas sa ByteDance na ibenta ang operasyon ng TikTok sa Amerika o tuluyang ipagbawal. 

Noon pa man, iginiit ng mga mambabatas sa Washington na maaaring gamitin ng Beijing ang TikTok upang makuha ang datos ng mga Amerikano o impluwensiyahan ang publiko sa pamamagitan ng makapangyarihang algorithm nito.

Matagal nang ipinagpaliban ni Pangulong Donald Trump ang pagpapatupad ng pagbabawal sa pamamagitan ng sunod-sunod na executive orders, na huling pinalawig hanggang Enero. Noong Setyembre, inanunsyo ng White House na may kasunduan nang naabot na tumutugon sa mga rekisito ng batas noong 2024.

Hindi pa malinaw kung mananatiling hawak ng ByteDance ang global unit ng TikTok, na ayon sa memo ay mamamahala sa interoperability ng produkto at ilang komersyal na aktibidad gaya ng e-commerce, advertising, at marketing.

(Larawan: TikTok)