MANILA — Umani ng papuri at suporta mula sa netizens ang aktres at direktor na si Bela Padilla matapos niyang harapin si Pangasinan Representative Mark Cojuangco sa social media kaugnay ng kontrobersyal nitong komento tungkol sa mga biktima ng pagbaha dulot ng Bagyong Tino sa Visayas.

Nagsimula ang isyu noong Nobyembre 8 matapos kumalat sa TikTok ang isang video na nagpapakita ng mga residente na hirap na hirap dahil sa matinding pagbaha. Sa X (dating Twitter), nagkomento si Cojuangco ng, “Bakit kasi sa flood plain gumawa ng tirahan? Takaw sakuna.”

Marami ang napa-react sa kanyang sinabi, kabilang na si Bela Padilla na agad nagbigay ng mahinahon pero matalim na sagot. Sa kanyang tweet, sinabi ni Bela, “Respectfully, you don’t start giving swimming lessons to a drowning man, sir. You save him first.”

Nilinaw pa ng aktres na hindi dapat isisi sa mga biktima ang kanilang sitwasyon dahil ang mga ganitong problema ay dapat inaasikaso ng mga lokal na pamahalaan. Dagdag niya, “Why didn’t the LGUs stop them from building there in the first place? Common folk don’t know where they can or can’t build.”

Mabilis na naging usap-usapan sa social media ang palitan ng pahayag ng dalawa. Maraming netizens ang pumabor kay Bela at sinabing tama ang kanyang punto — na sa oras ng sakuna, mas kailangang unahin ang pagtulong kaysa sa pagbibigay ng puna o sisi. Marami rin ang nagpahayag ng pagkadismaya kay Cojuangco dahil umano sa kakulangan ng empatiya sa mga nasalanta.

Sa ngayon, wala pang inilalabas na opisyal na pahayag o paghingi ng paumanhin ang kongresista hinggil sa isyu. Samantala, patuloy na tinatanggap ni Bela Padilla ang mga papuri at suporta mula sa publiko.

Ayon sa ilang netizen, nakaka-inspire umano ang aktres dahil ginagamit niya ang kanyang plataporma upang magsalita para sa mga ordinaryong Pilipino. Para sa marami, ang ginawa ni Bela ay patunay na ang mga artista ngayon ay hindi lang basta tahimik sa mga isyung panlipunan, kundi handa ring ipaglaban kung ano ang tama.

Marami ring fans ang nagkomento na si Bela ay halimbawa ng “smart and compassionate celebrity” — marunong magsalita, may puso para sa kapwa, at hindi takot magpahayag ng opinyon kahit laban sa mga nasa posisyon.

Sa gitna ng isyung ito, muling nabuksan ang usapan tungkol sa papel ng mga public officials sa pagtulong at pagprotekta sa mga mamamayan, lalo na sa panahon ng kalamidad. Tulad ng sinabi ni Bela, “You save them first” — isang simpleng paalala na sa oras ng trahedya, dapat mauna ang malasakit bago ang sisihan.