November 12, 2025 – Mukhang tuluyan nang isinara ni Joanna Bacosa ang kabanata ng buhay niya kay Manny Pacquiao. Sa panayam ng Kapuso Mo, Jessica Soho (KMJS), ibinahagi ng ina ni Eman Bacosa Pacquiao na matagal na siyang naka-move on sa Pambansang Kamao at mas pinili na niyang mamuhay nang tahimik kasama ang pamilya.

Ayon kay Joanna, masaya siya para sa anak dahil natupad na ang matagal nitong pangarap — ang kilalanin bilang anak ng dating world boxing champion. “Masaya ako para sa anak ko, pero medyo kabado rin ako kasi hindi ko alam kung ano ang susunod na mangyayari. Pero umaasa akong para sa ikabubuti ito ni Eman at ng lahat,” pahayag ng ina.

Ngayon ay isa na siyang pastora sa Antipas, North Cotabato. Ayon kay Joanna, naka-focus na siya sa kanyang pananampalataya at sa pagpapalaki ng mga anak. “Ayoko na pong magkaisyu kasi minsan kahit wala naman, pinapalaki pa ng iba. Ang mahalaga, okay na ang anak ko, at naka-move on na ako sa mga nangyari,” dagdag pa niya.

Kilalanin si Eman Bacosa Pacquiao. Ibinahagi ni Eman sa KMJS na ilang taon silang nanirahan sa Japan, kasama ang kanyang ina at mga kapatid, habang nagtatrabaho si Joanna roon. Doon din nakilala ni Joanna ang kanyang napangasawang si Sultan Ramir Diño, na siyang tumayong ama ni Eman.

Ngayong opisyal nang ginagamit ni Eman ang apelyidong Pacquiao, ipinaabot niya ang pasasalamat sa kanyang ama. “Hindi ako nagpapadala sa pangalan. Hindi ako si Manny Pacquiao, ako si Eman Bacosa Pacquiao. Kapag nasa ring ako, gusto kong ipakita na may mabuting puso ang mama ko at hindi siya masamang tao,” sabi ng binatang boksingero.

Maayos na ugnayan kay Jinkee. Tungkol naman sa relasyon ni Eman kay Jinkee Pacquiao, sinabi nitong maayos naman daw sila. “Okay naman po kami ni Tita Jinkee. Paminsan-minsan nagkakausap kami,” pagbabahagi niya.

Tahimik at mapayapang buhay. Sa ngayon, mas pinili ni Joanna na manatiling tahimik at iwasan ang anumang isyu. Ang tanging hangad daw niya ay ang patuloy na kabutihan at tagumpay ng kanyang anak. “Ang intensiyon ko lang talaga ay para sa kabutihan ni Eman. Lahat ng nangyari, ipinagpapasalamat ko sa Diyos,” sabi ni Joanna.

Ang pagkilala ni Manny kay Eman bilang anak ay nagsilbing bagong simula hindi lang para sa mag-ama, kundi para na rin sa ina nitong si Joanna — na ngayon ay mas pinili ang kapatawaran, pananampalataya, at katahimikan kaysa sa mga isyung iniwan ng nakaraan.