Nobyembre 27, 2025 – Ikinagulat at ikinatuwa ng fans ang biglaan ngunit napakamatamis na anunsyo ng longtime couple na sina Loisa Andalio at Ronnie Alonte na kasal na. Kasabay ng pagdiriwang ng kanilang ika-siyam na anibersaryo bilang magkasintahan, inanunsyo ni Ronnie nitong Huwebes, Nobyembre 27, 2025, ang kanilang pag-iisang dibdib sa pamamagitan ng mga larawang in-upload niya sa Instagram.

Sa naturang post, makikita ang ilang kuha mula sa kanilang intimate wedding ceremony. Walang ibinigay na detalye si Ronnie tungkol sa oras o lugar ng kasal, ngunit sapat na ang caption niyang, “Zup! Mrs. Alonte ”, para kumpirmahin ang malaking milestone sa kanilang relasyon. Nag-iwan naman agad si Loisa ng komento sa post ng aktor na may kasamang crying at heart emojis, tanda ng kanyang emosyonal at masayang reaksyon.

Ibinahagi rin ng aktres ang naturang larawan sa kanyang Instagram Stories, kalakip ang mensaheng, “Thank you Lord God,” bilang pasasalamat sa bagong yugto ng kanilang buhay mag-asawa. Mabilis namang nag-trending ang kanilang mga posts, na agad binaha ng well-wishes mula sa mga kaibigan sa industriya at kanilang fans.

Matatandaang Nobyembre 22 nang unang isapubliko ni Loisa ang kanilang engagement matapos niyang mag-post ng larawan kasama ang kanyang alagang aso. Hindi man naglagay ng caption, agad na umagaw ng pansin ang suot niyang oval-shaped engagement ring, na naging simula ng congratulatory messages mula sa netizens.

Sumunod naman noong Nobyembre 26, mismong araw ng kanilang 9th anniversary, nang i-upload ni Ronnie sa kanyang YouTube channel ang full proposal video. Makikitang ipinakita ng aktor ang pagpili niya ng disenyo ng singsing, maging ang engraving ng kanilang initials na “R.L.” at ang petsang “11.26”, simbolo ng kanilang pagsisimula bilang magkasintahan.

Sa video, mapapanood ang simpleng ngunit heartfelt na proposal. Pinanood muna ni Ronnie si Loisa ng isang montage ng kanilang mga alaala bago biglang lumabas sa screen ang mensaheng, “Will you marry me?” Nagulat ang aktres at sandaling nagtanong, “Tapos na? Ayan na?”, bago tuluyang lumuhod ang aktor at sabihing, “Beh, gusto ko marinig ang yes mo. Deserve mo ito. I love you. Will you marry me?” Sa huli, malinaw at matamis na “yes” ang isinagot ni Loisa.

Ikinuwento pa ni Ronnie na matagal na niyang pinaghandaan ang proposal, at matagal na rin niyang tinitipon ang mga gusto ni Loisa pagdating sa singsing at sa mismong engagement. Ayon sa aktor, hindi niya inasahang magiging ganoon ka-emosyonal ang karanasan at inilarawan niya itong “grabe” at “hindi makakalimutan.”

Sa ngayon, hindi pa ibinabahagi ng mag-asawa ang karagdagang detalye tungkol sa kanilang kasal—kung sino ang mga dumalo, saan naganap, o kung magkakaroon ba ng kasunod na celebration. Gayunman, sapat na ang ilang larawan upang ipahayag na pormal nang nagsimula ang kanilang buhay bilang mag-asawa.

Patuloy namang nagbubunyi ang fans sa bagong yugto ng relasyon nina Loisa at Ronnie, na kilala bilang isa sa pinakamatatag na young celebrity couples sa industriya. Ang kanilang kasal ay nagmarka ng isa pang magandang kabanata sa kanilang siyam na taon nang pagmamahalan.

Larawan: Loisa Andallio Facebook