Disyembre 4, 2025 – Hindi na bago kay Ivana Alawi ang magpakilig, magpatawa, at magpaiyak ng mga viewers sa kanyang mga social experiment vlog. Pero sa pagkakataong ito, tila mas maraming ingay ang nalikha ng kanyang kabutihang loob kaysa sa mismong kwento ng pagtulong. Trending ngayon ang aktres–vlogger matapos siyang ulanin ng puna at ac­cusations ng ilang netizens na ang ginagawa raw niyang content ay “poverty porn.”

Sa latest vlog ni Ivana, muli niyang isinagawa ang isa sa kanyang signature content—ang mag-disguise bilang isang buntis na nanghihingi ng tulong. Ang objective niya: hanapin ang isang tao na willing tumulong kahit walang kapalit, at siya namang bibigyan niya ng biyaya bilang pasasalamat.

Dito niya nakilala si Hesus Paraboles, isang lalaking naninirahang mag-isa sa kalsada. Agad na nakaantig sa aktres ang sitwasyon ni Hesus, kaya’t hindi siya nagdalawang-isip na tulungan ito. Sa video, makikita kung paanong nagmalasakit si Ivana, maging ang pagnanais niyang masigurong magiging maayos ang kapalaran ni Hesus. Kaya naman nagbigay siya ng pera, pagkain, at panawagan pa sa mga kaanak ni Hesus sa Bicol upang mahanap ito at matulungan pang lalo.

Kung ang intensyon ay kabutihan, bakit nga ba may ingay?

Sa social media, may ilang netizens na agad kumuda na ang ganitong klaseng videos ni Ivana ay porma umano ng “poverty porn”. Ibig sabihin, ginagamit daw ang mga kuwento ng kahirapan para makakuha ng views, simpatya, o para maging emosyonal ang audience—na para sa kanila, ay hindi raw tunay na pagtulong.

May ilan pang nagpahayag ng pag-aalala na baka raw hindi magamit nang tama ang perang ibinigay kay Hesus dahil kilala raw ito sa pag-inom. Dahil dito, may mga nagsasabing sana raw ay mas in-assess pa ni Ivana ang konsekwensya ng kanyang tulong.

Ngunit para sa karamihan ng viewers na nakapanood ng vlog, malinis at malinaw ang motibo ni Ivana: tumulong, magbigay-inspirasyon, at maghatid ng kabutihan—isang brand na kilala na niya sa vlogging industry. Marami ang nagkomento na na-touch sila, ilang beses naiyak, at mas lalo pang humanga sa puso ng aktres.

Sa kabilang banda, paniniwala ng ilan na baka inggit lang ang nagtutulak sa ibang content creators o netizens para pagdiskitahan ang aktres. Hindi naman maikakaila na malakas ang hatak ni Ivana sa social media—milyon-milyon ang views, consistent sa trending list, at isa sa pinakamasasabing crowd favorite pagdating sa feel-good content.

Sa gitna ng mga puna, nananatiling positibo ang karamihan ng kanyang supporters: ituloy lang daw ni Ivana ang ginagawa niyang pagtulong at huwag nang patulan ang mga bashers. Dahil sa huli, kung ang kabutihan ay iniintriga, problema na iyon ng mga naninira—hindi ng tumutulong.

Hanggang ngayon ay usap-usapan pa rin ang vlog at ang samu't saring reaksiyon dito. Pero kung may isang bagay na malinaw, iyon ay hindi matatawaran ang impact ni Ivana sa mga taong natutulungan niya, at sa mga viewer na nagiging inspired dahil sa kanyang generosity.

Larawan: Ivana Alawi YouTube