Disyembre 19, 2025 – Muling nasilayan ng publiko ang mailap na sa showbiz na si Erich Gonzales, at this time, hindi sa red carpet kundi sa 33rd Southeast Asian Games sa Thailand.

Kasama ni Erich ang asawang si Mateo Lorenzo upang suportahan ang kapatid nitong si Paola Lorenzo, na parehong lumaban bilang bahagi ng Philippine equestrian team sa prestihiyosong regional sports event.

Sa ilang Instagram Stories na ibinahagi ni Erich ngayong December 19, 2025, makikitang all-smiles siya habang may caption na simpleng-simple pero punong-puno ng pagmamalaki: “Team Philippines.”

Kitang-kita na bahagi si Erich ng entourage ng kanyang asawa at sister-in-law, at todo-suporta siya sa bawat laban ng mga ito.

Isa sa mga ibinahaging larawan ay kuha bago sumabak si Paola sa Individual Jumping category, na sinundan ng maikling pero makabuluhang reaksyon ni Erich: “So proud.”

At talagang may ipagmamalaki ang aktres—dahil nag-uwi si Paola ng silver medal, isang malaking karangalan para sa bansa.

May ibinahagi ring video si Erich kung saan maririnig si Paola na nagsabing, “This is Mateo’s battle also,” na tila nagpapatunay na teamwork at suporta ng pamilya ang naging puhunan nila sa kompetisyon.

Hindi rin pinalampas ni Erich ang isang family photo matapos ang awarding ceremony, kung saan makikita si Paola kasama si Mateo at ang kanilang mga magulang—isang eksenang punong-puno ng saya at emosyon.

Maging ang Equestrian Association of the Philippines ay nagpaabot ng pagbati, matapos kumpirmahin ang panalo ni Paola ng Silver Medal for Individual Jumping sa SEA Games 2025.

Nakuhanan pa ng camera si Erich habang masiglang pumapalakpak at nagdiriwang sa venue—patunay na kahit malayo na siya sa showbiz spotlight, solid pa rin ang kanyang suporta sa mga mahal niya sa buhay.

Sa pagkakataong ito, hindi artista si Erich Gonzales—isa siyang proud wife, hipag, at honorary “member” ng Team Philippines.

Larawan: Instagram