Tahimik pero punô ng pagmamahal na sinalubong ng magkasintahan ang bagong taon matapos kumpirmahin ni Ben Gunter na opisyal na silang mag-asawa ni Kiara Takahashi.

Sa isang Instagram post bago pumasok ang 2026, ibinahagi ng professional rugby player ang pasasalamat niya sa 2025—isang taong hindi niya malilimutan dahil dito raw niya pinakasalan ang “the one.” Ayon kay Ben, pinatunayan nilang posible ang long-distance love at mas lalo pa itong tumibay sa paglipas ng panahon.

Nagpaabot din siya ng taos-pusong mensahe para kay Kiara, na aniya’y nagbigay sa kanya ng buhay na hindi niya inakalang mararanasan. “Mahal kita,” dagdag pa ng atleta, sabay pasasalamat sa pamilyang sabay nilang binuo.

Hindi rin nakalimutan ni Ben na gunitain ang pinakamalaking pagbabago sa kanilang buhay—ang pagsilang ng kanilang anak na si Sekai Leon. Aniya, mula nang maging ama, tuluyan nang nagbago ang kanyang mundo at mas lalo niyang naunawaan ang tunay na kahulugan ng pasasalamat.

Sa comments, kilig na kilig namang sumagot si Kiara: “Married my bestie!! Love you and our boy so much!!”

Matatandaang ginawang Instagram-official ni Kiara ang kanilang relasyon noong Pebrero, sinundan ng emosyonal na pregnancy reveal noong Agosto. Noong Nobyembre, nag-propose si Ben sa isang espesyal na lugar—kung saan din nila balak itayo ang kanilang pangarap na tahanan. Makalipas lamang ang isang buwan, isinilang si Sekai Leon.

Sa kasalukuyan, nasa Japan ang mag-asawa. Ayon kay Kiara, naka-pause muna ang kanyang showbiz commitments upang tutok sa pagiging ina at sa bagong yugto ng kanyang buhay. Aniya, babalik man siya sa industriya, dala niya ang mas “grown” at mas makabuluhang bersyon ng sarili—hugot mula sa karanasan bilang isang ina.