Isang jacket lang ba talaga… o isa na namang fashion moment na ginawang personality ng buong internet?

Usap-usapan ngayon online ang Adidas Chinese New Year (CNY) jacket matapos itong mag-viral sa social media dahil sa kakaibang design na halong traditional Chinese elements at modern streetwear vibe. Mula TikTok hanggang Instagram, kaliwa’t kanan ang OOTD posts, fit checks, at “Saan mo nabili?!” comments.

Pero bakit nga ba parang may presscon levels ang ingay para sa isang jacket?

Ang naturang piraso ay may detalye na inspired sa tradisyunal na Chinese style—mandarin collar at statement closures—pero nilapatan ng sporty at street-ready na atake ng Adidas. Resulta? Isang outfit piece na mukhang may heritage, pero ready pang-hypebeast.

Dahil dito, marami ang nagsasabing hindi lang ito basta pamporma — isa raw itong statement piece. Yung tipong kahit simpleng lakad lang sa mall, parang may sariling spotlight ang suot mo. Kaya hindi na rin nakapagtataka kung bakit pati mga fashion influencers at style content creators, todo flex dito.

At siyempre, kapag may limited stocks at hirap hanapin, mas lalong umiinit ang usapan. Mas lalong dumadami ang may gustong makakuha. Classic case ng: habang mas bihira, mas hinahabol.

Fashion appreciation lang ba ito?
O isa na namang item na nadala ng social media hype train?
At kung mawala ang ingay bukas… iconic pa rin kaya?

Sa ngayon, isang bagay ang sigurado — ang Adidas CNY jacket ang patunay na minsan, hindi lang tao ang nagiging main character… pati damit, kaya rin.