Mas lalong umiigting ang pagbabantay ng Movie and Television Review and Classification Board (MTRCB) habang mabilis na nagbabago ang paraan ng panonood ng mga Pilipino—mula telebisyon hanggang online platforms at AI-generated content.

Ibinahagi ni MTRCB Chairwoman at CEO Lala Sotto na umabot na sa ₱670 milyon ang natipid na pondo ng ahensya nitong nakaraang taon. Mas mataas ito sa naunang ulat na mahigit ₱633 milyon na naideposito na sa Bureau of Treasury.

Ayon kay Chair Lala, indikasyon ito ng maayos na pamamahala at pagiging maingat sa paggastos ng ahensya. Sa talaan ng kita, lumagpas umano sa target ang koleksyon ng MTRCB noong 2024, habang sa unang kalahati ng 2025 ay malaki na rin ang naabot ng kanilang taunang projection.

Inamin din ng chair na malaki ang naging impluwensya ng kanyang ama na si Senate President Tito Sotto pagdating sa pagiging praktikal sa pera. Aniya, mas naging responsable siya sa gastusin nang magbago ang kanyang mga prayoridad bilang isang ina.

Para sa panukalang 2026 budget, ₱55 milyon lamang ang hinihingi ng MTRCB mula sa pambansang pamahalaan para sa pasahod ng mga empleyado, habang ang natitirang gastusin ay sasagutin na ng sariling kita ng ahensya.

Responsableng panonood, mas mahalaga ngayon

Patuloy ring isinusulong ng MTRCB ang kampanya nitong Responsableng Panonood, lalo na sa panahon ng streaming services, OTT platforms, social media, at user-generated content.

Paliwanag ni Chair Lala, hindi layunin ng ahensya na magbantay para manghuli, kundi upang gabayan ang mga pamilya—lalo na ang mga magulang—sa pagpili ng angkop na palabas para sa kanilang mga anak.

Kasama rin sa tinututukan ngayon ang paggamit ng artificial intelligence, partikular ang mga kaso ng maling o abusadong aplikasyon nito. Nakikipagtulungan umano ang MTRCB sa Department of Justice (DOJ) at Department of Information and Communications Technology (DICT) upang paigtingin ang kamalayan ng publiko tungkol dito.

Batang Quiapo at PBB, dumaan sa dayalogo

Aktibo rin ang ahensya sa pakikipag-usap sa mga television producers. Ilang beses na umanong nagkaroon ng pag-uusap ang MTRCB at ang produksiyon ng FPJ’s Batang Quiapo, na agad naging paksa ng espekulasyon.

Nilinaw naman ni Chair Lala na bahagi lamang ito ng regular na dayalogo at hindi agad nangangahulugang may paglabag.

Kamakailan ay nakausap din ng MTRCB ang pamunuan ng Pinoy Big Brother (PBB) matapos ipahayag ng ilang babaeng housemates ang kanilang pagkadismaya sa ilang pangyayari sa loob ng Bahay ni Kuya.

Layunin ng pulong na matiyak na nasusunod ang Safe Spaces Act at nananatiling ligtas at maayos ang kapaligiran ng mga kalahok na magkakasama sa iisang tirahan sa loob ng mahabang panahon. Ayon kay Chair Lala, naging maayos ang usapan at agad ding naaksyunan ang mga alalahanin.

Mga kontrobersiya at hamon ng industriya

Hindi rin nakaligtas sa batikos ang MTRCB matapos ipagbawal ang pelikulang Dreamboi, na dalawang beses na hindi pumasa sa review. Nauwi pa ito sa pambabatikos mula sa ilang personalidad sa social media, bagama’t may mga naglabas din ng paghingi ng paumanhin kalaunan.

Sa mas malawak na pananaw, inamin ni Chair Lala na hindi naging madali ang 2025 para sa entertainment industry, hindi lamang sa Pilipinas kundi pati sa ibang bansa. Kabilang sa mga dahilan ang pagdami ng streaming platforms at ang patuloy na pagtaas ng presyo ng sine.

Gayunpaman, iginiit niyang hindi maaaring isantabi ng MTRCB ang mandato nito sa ilalim ng Presidential Decree No. 1986, na nagbibigay sa ahensya ng kapangyarihang magklasipika ng mga palabas upang maprotektahan ang publiko—lalo na ang mga bata.

Sa gitna ng pagbabago ng teknolohiya at pag-usbong ng AI, malinaw ang paninindigan ng MTRCB: mananatili silang mapagmatyag, at patuloy na isusulong ang ligtas at responsableng panonood para sa bawat pamilyang Pilipino.