MANILA, March 4, 2025 – Iniimbestigahan ng Department of Public Works and Highways (DPWH) ang disenyo ng Cabagan-Sta. Maria Bridge sa Isabela bilang posibleng dahilan ng pagbagsak nito noong Pebrero 27, 2025.

Ang tulay, na nag-uugnay sa mga bayan ng Cabagan at Sta. Maria, ay bumagsak matapos dumaan ang isang dump truck na may kargang malalaking bato na may kabuuang timbang na tinatayang 102 tonelada.

Binigyang-diin ni DPWH Secretary Manuel Bonoan na maaaring may kinalaman ang kakaibang disenyo ng tulay sa pagbagsak nito.

"This is a unique design… First of its kind dito," ani Bonoan. "Yung cables kasi nito are solid steel hindi strand, hindi cable strand. When you do this kind of structure, dapat cable strands ang ginagamit dito kasi may tensile stress ito."

Humingi ng tulong ang DPWH sa mga eksperto mula sa Bureau of Design at Bureau of Construction upang magsagawa ng masusing pagsusuri sa tulay.

"We are looking into the stability of the bridge’s design and other possible factors that may have contributed to the collapse," dagdag ni Bonoan.

Ang tulay, na nagkakahalaga ng PHP 1.22 bilyon, ay natapos noong Pebrero 1, 2025 at idinisenyo ng pribadong consortium na UTCP at engineer Albert Cañete.

Ang kontraktor nitong R.D. Interior Junior Construction ay natapos ang proyekto noong 2018, ngunit hindi agad binuksan sa publiko dahil sa mga kinakailangang pagbabago sa disenyo.

Noong 2022, isinailalim ito sa retrofitting upang sumunod sa updated design codes, na nagdagdag ng PHP 300 milyon sa kabuuang gastos.

Batay sa CCTV footage, dalawang truck na may kargang bato ang unang dumaan sa tulay bago ito bumagsak.

Tinitingnan din ng DPWH ang posibilidad na ang overloading ay isa sa mga pangunahing dahilan ng insidente.

"Overstressed yung bridge, 200% yata," ayon kay Bonoan.

Anim na indibidwal ang nasugatan sa pagbagsak ng tulay, at pinayuhan ng mga lokal na awtoridad ang mga motorista na gumamit ng alternatibong ruta.

Pinag-aaralan din ng DPWH ang pagsasampa ng kaso laban sa trucking company na may-ari ng overloaded vehicle.

"We are considering legal actions against the truck company for violating weight limits," ani Bonoan.

Si dating DPWH Secretary Rogelio Singson, na nag-apruba ng proyekto noong 2014, ay nagsabing ipaubaya na lamang sa imbestigasyon ng DPWH ang anumang katanungan ukol sa insidente.

Patuloy na sinusuri ng DPWH ang sitwasyon at magbibigay ng karagdagang impormasyon sa mga susunod na araw.

Image Courtesy of Tuguegarao City 101