Maynila, Pilipinas — Nakatakdang ipatupad ng pamahalaan ang digital na sistema sa pamamahagi ng ayuda, kabilang ang Tulong Panghanapbuhay sa Ating Disadvantaged/Displaced Workers (TUPAD) program, upang mapabilis at mas maging episyente ang transaksiyon ng mga benepisyaryo.

Kinumpirma ito ni Presidential Communications Office (PCO) Undersecretary Claire Castro sa isang press briefing sa Malacañang ngayong Martes, kung saan binigyang-diin niya na isa sa mga pangunahing layunin ng administrasyong Marcos ang digitalisasyon ng serbisyo publiko.

"Iyon po ang balakin dahil sabi nga po natin, ang naisin po ng Pangulo ay magkaroon ng 90% na digitalization para po mabilis ang transaksiyon ng mga taumbayan sa pamahalaan," ani Castro.

Bilang bahagi ng digital shift, sinimulan na ng pamahalaan ang pamamahagi ng mobile phones sa mga benepisyaryo ng Pantawid Pamilyang Pilipino Program (4Ps) sa tulong ng isang partnership sa pagitan ng Department of Social Welfare and Development (DSWD), Globe Telecom, GCash, at G-Exchange Inc.

Ang inisyatibang ito, na tinawag na "IPANALO ang Kinabukasan," ay naglalayong bigyan ng access sa makabagong teknolohiya ang mga benepisyaryo, lalo na ang mga nasa malalayong lugar, upang matutong gamitin ang digital tools at pamahalaan nang mas epektibo ang kanilang natatanggap na ayuda.

"Isang hakbang ito patungo sa mas inklusibo at makabagong paraan ng pagtulong sa ating mga kababayang nangangailangan. Sa pamamagitan ng teknolohiya, mas magiging mabilis, epektibo, at ligtas ang pagtanggap nila ng suporta mula sa pamahalaan," ayon sa PCO.

Sa kabila ng positibong tugon, ilang sektor ang nagpahayag ng pangamba kung may sapat na kaalaman ang mga benepisyaryo sa paggamit ng digital applications na kasama sa programang ito. Tiniyak ni Castro na magkakaroon ng mga pagsasanay sa digital literacy sa pangunguna ng DSWD upang matulungan ang mga benepisyaryo na mas maunawaan at magamit nang tama ang teknolohiya.

"Sa pamamagitan po ng DSWD, magkakaroon po tayo ng literacy activities. Tuturuan po talaga natin iyong mga hindi pa po sanay gumamit ng mga gadget na tulad po nito para po hindi naman po masayang iyong proyektong ito ng Pangulo," paliwanag niya.

Ang inisyatibang ito ay isang malaking hakbang tungo sa modernisasyon ng sistema ng pamamahagi ng ayuda sa bansa, kasabay ng pagtutulak ng administrasyong Marcos para sa mas episyente at mas digital na serbisyo publiko.

Larawan mula sa Philippine Information Agency