6 Mayo 2025 – May bahagyang gaan sa bulsa ang mga motorista sa buong bansa simula ngayong araw, matapos ipatupad ng mga kompanya ng langis ang rollback sa presyo ng mga produktong petrolyo, kasunod ng dalawang linggong sunod-sunod na pagtaas.

Sa magkakahiwalay na abiso, kinumpirma ng Chevron Philippines Inc. (Caltex), Seaoil Philippines Corp., at Shell Pilipinas Corp. na magpapatupad sila ng bawas-presyo na ₱0.55 kada litro sa gasolina, ₱0.65 sa diesel, at ₱0.90 sa kerosene.

Ang Cleanfuel ay magpapatupad din ng kaparehong rollback maliban sa kerosene na wala sa kanilang produkto. Ang karamihan sa mga kompanya ay magsisimula ng price adjustment alas-6 ng umaga, habang 8:01 a.m. naman ang rollback ng Cleanfuel.

Ayon sa Department of Energy’s Oil Industry Management Bureau (DOE-OIMB), ang rollback ay bunsod ng oversupply sa pandaigdigang merkado at ng epekto ng U.S. tariff policies sa pandaigdigang ekonomiya at demand sa langis.

Dagdag pa ng DOE, inaasahan din ang pagtaas ng produksyon ng langis ng Saudi Arabia, at may naitalang dagdag na 0.8 milyong bariles sa imbentaryo ng U.S. crude oil—mga salik na nakaaapekto sa pagbaba ng presyo.

Noong nakaraang linggo, nagtala ng taas-presyo na ₱1.35 kada litro sa gasolina, ₱0.80 sa diesel, at ₱0.70 sa kerosene.

Dahil sa bagong rollback, umabot na sa ₱3.10 ang year-to-date net increase ng gasolina, ₱3.00 para sa diesel, habang ang kerosene ay may netong ₱2.00 na kabawasan kada litro.

Patuloy na binabantayan ng DOE-OIMB ang pandaigdigang kalakaran ng langis, at pinaaalalahanan ang publiko na maaaring magkaiba-iba ang presyo depende sa lokasyon at brand ng gasolinahan.

Sa kabila ng rollback, nagbabala ang ilang eksperto na mananatiling pabagu-bago ang presyo ng langis dahil sa mga hindi tiyak na kalagayan sa pandaigdigang merkado.