MANILA — Umabot sa 35 unibersidad mula sa Pilipinas ang nakapasok sa prestihiyosong 2026 QS Asia University Rankings, ayon sa inilabas na listahan ng Quacquarelli Symonds (QS) nitong Nobyembre 5. Ito ang pinakamataas na bilang ng mga institusyong Pilipino na naitala sa kasaysayan ng QS Asia rankings.

Nanguna sa listahan ang University of the Philippines (UP), na nananatiling nasa top 100 sa buong Asia. Kasama rin sa mga nangungunang pamantasan ang Ateneo de Manila University, De La Salle University, University of Santo Tomas (UST), at Mapúa University.

Bukod sa mga kilalang institusyon, ilang regional universities ang nakapasok sa rankings dahil sa pagtaas ng kanilang research output at international collaborations, kabilang ang Silliman University, Mindanao State University – Iligan Institute of Technology, Visayas State University, at Cebu Technological University.

Ayon sa QS, ang mga pamantasan ay sinuri batay sa mga sumusunod na criteria:

• Academic reputation
• Employer reputation
• Faculty-student ratio
• Internationalization
• Research citations

Mga bagong pasok sa listahan ngayong taon:

• Tarlac State University
• University of Southern Mindanao
• Nueva Ecija University of Science and Technology (NEUST)
• University of Eastern Philippines

Sinabi ng Commission on Higher Education (CHED) na ang pagpasok ng mas maraming unibersidad sa QS rankings ay patunay ng lumalawak na kalidad ng edukasyon sa bansa, lalo na sa mga rehiyon.

Ang QS Asia University Rankings ay isa sa mga pinakapinagkakatiwalaang global university rankings, na inilalabas taun-taon upang sukatin ang performance ng mga higher education institutions sa buong Asia.

Larawan mula CS Edu Services