Si Rhenz Abando ay isa sa pinakamahalagang bahagi ng tagumpay ng Strong Group sa 34th Dubai International Basketball Championship. Siya ang star player ng koponan, hindi lang sa court kundi pati na rin sa kanyang pinagdadaanang emosyonal na hamon. Habang nananatiling walang talo ang Strong Group sa group stage (4-0), si Abando—na nangunguna sa local scorers ng koponan na may 9.0 puntos bawat laro—ay nagbigay ng malaking kontribusyon sa kanilang winning streak.

Matapos ang kanyang walong buwang layoff, inamin ni Abando na napakalaking bagay ng torneo para sa kanyang pagbabalik.

“Super laking tulong nito sa experience ko, knowing na hindi ako nakapaglaro nang eight months or almost a year. Para akong nangangapa ulit. Wala akong momentum, kaya super laking tulong nito sa’kin. Parang stepping stone ulit ‘to para makabalik ako,” ani Abando.

Sa bawat laro ng dating University of Santo Tomas standout, ipinapakita niya ang dedikasyon at passion na nagmumula sa kanyang personal na motibasyon.

Ngunit sa kabila ng kanyang tagumpay sa court, dumaan si Abando sa isang matinding emosyonal na pagsubok. Ilang araw matapos dumating ang kanilang koponan sa Dubai, natanggap niya ang masakit na balita tungkol sa pagpanaw ng kanyang Lola Ansing. Hindi lamang lola si Lola Ansing para kay Abando, kundi siya rin ang naging "nanay" at "tatay" sa kanya habang lumalaki siya sa isang pamilyang walang ama.

“Laking lola ako. Lumaki ako sa pamilyang walang tatay, kaya lola ko ang naging nanay sa amin, at ang nanay ko naman ang naging tatay,” emosyonal na pahayag ni Abando.

Sa kabila ng matinding kalungkutan, ginamit niya ang laro bilang isang paraan upang maibsan ang bigat ng kanyang nararamdaman. Patuloy niyang ipinapakita ang kanyang dedikasyon, hindi lang para sa kanyang mga teammates kundi para rin sa alaala ng kanyang lola at sa kanyang pamilya.

“Ginagawa ko ‘to para sa pamilya ko, hindi lang para sa sarili ko. Gusto kong maranasan nila ang magandang buhay, lalo na ‘yung lola at mama ko. Ang dami nilang sinakripisyo para sa’min. Pero ang goal pa rin dito ay maging champion,” saad ni Abando.

Habang papalapit ang quarterfinals, handa na ang Strong Group sa kanilang susunod na laban kontra Sharjah Sports Club, at tiyak na madadala ni Abando ang kanyang lakas at inspirasyon sa kanilang paghahanda. Ang kanyang tagumpay ay hindi lang kwento ng basketball—ito ay isang kwento ng resilience, pagmamahal, at dedikasyon sa pamilya.

Larawan mula sa Dubai Basketball Championship