Si Marcus Jordan, anak ng basketball icon na si Michael Jordan, ay inaresto sa Florida dahil sa kasong may kinalaman sa droga at paglaban sa pag-aresto matapos ma-stuck ang kanyang sasakyan sa riles ng tren, ayon sa isang arrest affidavit. 

Ang 34-anyos na residente ng Orlando ay dinakip bago mag-alas-dos ng umaga noong Martes sa Maitland. 

Isang pulis ang nakakita sa isang asul na Lamborghini SUV na nakahinto sa riles ng tren at agad na nag-abiso sa SunRail, ang commuter rail system, bago lumapit sa sasakyan, ayon sa affidavit. 

Nang lapitan si Jordan, naamoy ng pulis ang amoy ng alak at napansin na malabo ang kanyang pananalita, pati na rin ang kanyang namumula, singkit, at makintab na mga mata, ayon sa ulat. 

Base sa affidavit, napag-alaman ng mga pulis na ang sasakyan ay umano’y tumakas mula sa isang traffic stop na isinagawa ng Seminole County Sheriff’s Office. 

Sinabi umano ni Marcus Jordan sa pulis na naligaw siya ng daan at kailangan niya ng tulong upang maalis ang kanyang sasakyan sa riles. Ayon pa sa affidavit, may isa pang pasahero sa loob ng sasakyan. 

Aminado umano si Jordan na "uminom siya ng ilang baso" ng alak noong gabing iyon ngunit iginiit niyang "hindi siya lagpas sa legal na limitasyon," ayon sa ulat.

Matapos sumailalim sa field sobriety tests, inaresto si Marcus Jordan para sa kasong driving under the influence (DUI), ayon sa affidavit.  

Natagpuan din ang isang "malinaw na plastik na bag na may puting pulbos" sa kanang bulsa ng kanyang pantalon, na kalaunan ay nagpositibo sa cocaine, ayon sa ulat.

Umano’y tumanggi si Jordan na sumunod nang utusan siyang sumakay sa patrol vehicle at hindi rin siya pumayag na magbigay ng breath samples sa Orange County DUI Center, ayon sa affidavit.

Inaresto si Marcus Jordan para sa kasong DUI at nahaharap sa mga paratang ng pagdadala ng cocaine at paglaban sa isang opisyal nang walang dahas, ayon sa affidavit. Siya ay ikinulong sa Orange County jail nang walang insidente. 

Matapos siyang palayain noong Martes, tumanggi siyang sagutin ang mga tanong ng mga mamamahayag. Walang nakalistang abogado para sa kanya sa online court records.

Si Marcus Jordan ay isa sa limang anak ng basketball legend na si Michael Jordan. 

Dati siyang manlalaro ng college basketball para sa University of Central Florida. Sa affidavit, nakasaad na ang kanyang kasalukuyang trabaho ay self-employed.