Isang hakbang na lang, at mukhang si Jaehyun Jung na ang mag-uuwi ng low medal honors sa Philippine Golf Tour (PGT) Qualifying School! Matapos ang matinding bakbakan sa third round nitong Huwebes, Pebrero 20, 2025, pinanatili niya ang kanyang puwesto sa tuktok ng leaderboard. Nakapagtala ang Korean golf player ng lamang na limang stroke laban sa pinakamalapit niyang katunggali.

Pero hindi pa dito natatapos ang labanan! Sa likod ni Jung, umiinit pa lalo ang sagupaan para sa natitirang Tour cards. Tatlumpung manlalaro lang ang makakakuha ng spot sa prestihiyosong 10-leg PGT circuit na magsisimula sa Pradera Verde sa Lunes, Pebrero 24, 2025.

Matindi ang simula ni Jung. Nagpakawala siya ng back-to-back birdies sa ikaapat na butas, sinundan pa ng isa sa ikasampu. Pero sa golf, hindi lang galing kundi tibay ng loob ang kailangan. Sa ika-11 butas, biglang nagbago ang direksyon ng hangin. Sa halip na pabor sa kanya, umihis ang bola, napunta sa hazard, at nasundan ng tatlong putt. Isang triple bogey ang sumira sa kanyang momentum.

Hindi pa roon natapos ang pagsubok. Isa pang bogey sa ika-14 ang nagdagdag sa kanyang mga pagkakamali. Pero hindi siya natinag. Bumawi agad sa ika-15, naglagay ng birdie, at nagtapos ng even-par sa huling tatlong butas para sa iskor na 73. Tatlong sunod na rounds na siyang nasa unahan, may kabuuang five-under 211.

“I thought I was playing against the wind when I set up for my tee shot on No. 11, but the wind shifted, and the ball ended up in the hazard,” aminado si Jung. “I played pretty conservatively over the past three days, but tomorrow (Friday), I’ll try to be more aggressive.”

Habang lumalayo si Jung, dumikit naman si Carl Corpus sa second place matapos ang 73 para sa kabuuang 216. Samantala, magkasalo sa third place sina Chris delos Santos at Yuto Hayashi na may 219, matapos magtala ng 71 at 72, ayon sa pagkakasunod.

Nasa ikalimang puwesto si Paul Echavez (220), sinundan ni Atsushi Ueda (221). Magkasalo naman sa ikapitong puwesto sina Jhondie Quibol at Belem Arancon na may 223. Tumatambay sa ika-10 puwesto ang tatlong beterano—Toru Nakajima, James Ryan Lam, at Rey Pagunsan—na pawang may 225.

Pero ang tunay na drama ay nasa cut-off line! Delikado ang lagay ng mga nasa puwestong 28 hanggang 31, kabilang sina GJ Katigbak at Anthony Fernando (230). Kasunod nila sina Kai Yasuma at Yudai Nakakuki (231), Richard Sinfuego (232), at Paolo Wong (229), na kailangang magpakitang-gilas sa huling round kung ayaw nilang mapalabas sa top 30.

Isang round na lang ang natitira, at bawat palo ay may katumbas na pangarap. Para kay Jung, ito ay ang pagiging low medalist at pagpasok sa PGT bilang isang paborito. Para sa iba, ito naman ang pagkakataong sumali sa pinakamalaking pro tour ng bansa.

Larawan: Pilipinas Golf