DALLAS, March 5, 2025 —Matinding dagok ang natanggap ng Dallas Mavericks matapos makumpirma na may torn ACL sa kaliwang tuhod si Kyrie Irving, dahilan upang hindi na siya makapaglaro sa natitirang bahagi ng 2024-25 season. Nasaktan si Irving sa unang quarter ng laban noong Lunes matapos itong sumubok ng drive sa basket at hindi magandang naporma ang paa. Sa kabila ng matinding sakit, nagawa pa rin niyang itira at ipasok ang dalawang free throws bago tuluyang bumalik sa locker room.

Mas lalong naging mahirap ang sitwasyon ng Mavericks dahil sa sunod-sunod na injuries sa kanilang lineup. Kasama na rito sina Anthony Davis, Daniel Gafford, Dereck Lively II, P.J. Washington, Caleb Martin, at Jaden Hardy. Simula nang i-trade si Luka Doncic sa Los Angeles Lakers nitong Pebrero, tila sunod-sunod na ang naging injury problems ng Dallas.

Si Doncic, na naging malapit kay Irving sa halos dalawang taong pagsasama nila sa Dallas, ay agad nagpadala ng mensahe ng suporta sa kanyang dating kakampi. Sa Instagram, nag-post siya ng isang simpleng ngunit makabagbag-damdaming mensahe:

“You will come back stronger, mi hermano.”

Kilala ang samahan nina Doncic at Irving, at madalas nilang tawagin ang isa’t isa na “hermano,” na ang ibig sabihin ay “kapatid” sa Spanish. Malaki ang naging papel nila sa tagumpay ng Mavericks noong nakaraang season, lalo na sa kanilang epic run patungong NBA Finals, kung saan natalo sila sa Boston Celtics.

Kahit magkalaban na ngayon, hindi maitatanggi ang respeto at pagkakaibigan ng dalawa. Sa kanilang huling matchup, nagpakitang-gilas si Doncic sa pamamagitan ng isang triple-double, habang nagtala naman si Irving ng 35 puntos. Sa huli, nanalo ang Lakers sa iskor na 107-99, ngunit kitang-kita ang init ng kanilang kumpetisyon.

Habang pilit bumabangon ang Dallas mula sa sunod-sunod na injuries, nagsilbing paalala ang mensahe ni Doncic na higit pa sa laro ang basketball—ito ay tungkol din sa mga pagkakaibigang nabubuo sa loob ng court.

Larawan: Gary A. Vasquez-Imagn Images