DALLAS, March 5, 2025 — Patuloy na dumaranas ng matinding pagsubok ang Dallas Mavericks ngayong season, dahil posibleng hindi na makabalik si Anthony Davis matapos siyang magtamo ng adductor injury. Mas lumala ang sitwasyon ng koponan matapos ang season-ending ACL injury ni Kyrie Irving, dahilan para malagay sa alanganin ang playoff hopes ng Dallas. 

Matatandaang nakuha ng Mavericks si Davis at Max Christie sa isang blockbuster trade na nagpadala kay Luka Doncic sa Los Angeles Lakers. Ang layunin ng trade ay patatagin ang lineup ng Dallas para sa playoffs. Subalit, sa kanyang debut game noong Pebrero 8, nagtamo si Davis ng injury sa gitna ng isang dominanteng performance na may 26 points, 16 rebounds, 7 assists, at 3 steals sa loob ng 31 minutes. 

Patuloy ang rehabilitasyon ni Davis, ngunit nagiging maingat ang Mavericks sa kanyang pagbabalik upang maiwasan ang mas malalang injury. Sa pagkawala ni Irving at iba pang key players, lumalakas ang posibilidad na hindi na ipalaro si Davis sa natitirang bahagi ng season. 

Ayon kay ESPN Insider Shams Charania, seryoso nang pinag-uusapan nina Davis at ng kanyang kampo ang posibilidad na hindi na siya bumalik ngayong season. “I think him, his representatives, they’re going to huddle up, and they’re going to have some very hard conversations,” ani Charania sa The Pat McAfee Show. “It’s not out of the realm of possibility that that one game is the last time we see Anthony Davis this season.” 

Bukod kay Davis at Irving, pito na ang nasa injury list ng Mavericks, kabilang sina Daniel Gafford, Dereck Lively II, P.J. Washington, Caleb Martin, at Jaden Hardy. Dahil dito, lalo pang lumiliit ang tsansa ng Dallas na makasabay sa kompetisyon. 

Sa kabila ng lahat, nananatiling naka-kontrata si Davis sa Mavericks hanggang 2027-28 season. Kapag nasa tamang kondisyon, isa siyang dominante sa court, may average na 25.7 points, 12.0 rebounds, 3.4 assists, 2.2 blocks, at 1.3 steals sa loob ng 43 laro ngayong season. 

Habang papalapit ang playoffs, kailangang makahanap ng mabilisang solusyon ang Mavericks, kundi maaaring tuluyan nang mawala ang kanilang tsansa sa postseason. 

Larawan: Jerome Miron-Imagn Images