NUEVA ECIJA, Marso 9, 2025 — Sa isang di malilimutang laban sa Lyceum of the Philippines University Gym sa Maynila noong Sabado, isang makasaysayang upset ang ginawa ng Colegio de San Juan de Letran Lady Knights. Pinatumba nila ang three-time defending champion De La Salle-College of Saint Benilde Lady Blazers sa iskor na 25-22, 25-23, 26-24. Ito ay bahagi ng NCAA Season 100 women’s volleyball tournament at nagpatigil sa matagal nang winning streak ng Benilde.

Sa panalong ito, hindi lang umangat sa 3-0 record ang Lady Knights. Sinira rin nila ang historic 43-game winning streak ng Lady Blazers, na tumagal ng 1,874 araw mula noong Enero 10, 2020. Huling natalo ang Benilde noong Enero 29, 2019, sa Final Four ng Season 94 laban sa Perpetual Help.

Mula sa unang set, matapang na lumaban ang Letran. Sa kabila ng pressure ng paglaban sa powerhouse team, nanatili silang composed at aggressive. Pinangunahan ni Yen Martin ang opensa ng Lady Knights na may 19 points, kasunod sina Vanessa Sarie na may 15 points at Judiel Nitura na may 12 points. Hindi rin nagpahuli sa depensa ang Letran, kung saan nag-ambag si Sarie ng 12 excellent receptions at 3 aces, habang may 7 excellent digs naman si Nitura.

Para kay Letran head coach Oliver Almadro, ang panalong ito ay patunay sa determinasyon ng kanyang koponan. “I credit it to the players, at sabi ko nga sa kanila, no expectations. We have to learn in this game. Pero they really want to win. They refused to lose,” ani Almadro.

Binigyang-diin din ng Letran coach ang pagsusumikap ng kanyang team para makamit ang tagumpay. “They really want to win, so who am I, bilang nag-ga-guide sa kanila, to prevent it? Sila ang may gusto nito. Hiningi nila ito, at ibinigay sa kanila ng Panginoon.”

“Sabi lang namin kanina, let’s just have a joyful heart and offer it to the Lord. Kung anong ibibigay sa amin, we’ll take it. Ang importante, may matututunan kami.”

Sinubukan pang bumawi ng Benilde sa likod nina Wielyn Estoque na may 13 points at Mycah Go na may 9 points. Gayunpaman, hindi nila nagawang makontrol ang momentum ng laban. Umabot sa set point ang Lady Knights sa 24-23 matapos ang isang matinding atake ni Nitura. Sinubukan pang ipanalo ng Benilde ang rally, ngunit ang huling attack ni Jessa Dorog ay lumabas ng linya, tuluyang nagtapos sa kanilang apat na taong winning streak.

Larawan: NCAA/GMA