March 28, 2025 – Ibinahagi ni NBA superstar LeBron James ang tungkol sa kanyang relasyon kay Michael Jordan at ang pag-unlad ng kanyang anak na si Bronny James sa liga. Ang four-time NBA champion ay lumabas sa The Pat McAfee Show nitong Miyerkules, kung saan ibinahagi niya ang kanyang pananaw sa dinamikong ugnayan nila ng basketball legend na iniidolo niya noong bata pa siya.

Ayon kay James, nasa "good spot" naman ang relasyon nila ni Jordan, pero hindi raw sila madalas mag-usap.

"We don't talk," pag-amin ni James. "Because I'm still playing. I'm still focused on my craft right now."

Naniniwala si James na posibleng lumalim pa ang kanilang ugnayan kapag nagretiro na siya, tulad ng nangyari sa relasyon nila ni Kobe Bryant matapos nitong lisanin ang NBA.

"Me and Kobe never had a real relationship either," sabi ni James. "We were always competitive. But once he retired, it changed. He embraced me when I came to L.A. I hope it can be the same with MJ."

Bagama’t hindi sila madalas mag-usap, nagkaroon sila ni Jordan ng espesyal na sandali sa 2022 NBA All-Star Game sa Cleveland, kung saan nagyakapan sila bilang bahagi ng pagdiriwang ng 75th Anniversary ng liga.

"That was dope," sabi ni James. "I wear 23 because of MJ. He was my inspiration growing up in Akron."

Bukod kay Jordan, ibinahagi rin ni James ang tungkol sa pag-usad ng career ni Bronny sa kanyang rookie season kasama ang Lakers. Ang 19-anyos na guard, na napili bilang 55th overall pick sa NBA Draft, ay kamakailan lang nagtala ng season-high 17 points para sa Lakers at sinundan ito ng isang 39-point game sa G League.

"Super proud of Bronny," ani James. "As a dad, it’s not about stats—just seeing his growth is everything."

Sa edad na 40, patuloy pa ring naglalaro si James, kaya’t hindi maiwasan ang espekulasyon kung tatagal pa siya sa NBA upang makasama sa court hindi lang si Bronny kundi pati ang bunso niyang anak na si Bryce, na kamakailan lang nag-commit sa Arizona.

"Don’t do that to me," pabirong sagot ni James. "Let me focus on the now."