April 18 - Inamin ni Fernando Alonso na hindi niya nakikita ang sarili na patuloy na magmamaneho sa Formula One kapag siya ay umabot na sa edad na 50.

Sa edad na 43, patuloy pa ring pinangungunahan ni Alonso ang Aston Martin sa kanilang ika-100 na karera sa F1 ngayong Linggo sa Saudi Arabian Grand Prix, taglay pa rin ang kasigasigan ng isang baguhang driver.

Bagamat mas matanda pa sa pinagsamang edad ng mga rookie na sina Kimi Antonelli at Oliver Bearman, may open-ended contract pa rin si Alonso sa Aston Martin — isang ambisyosong koponan na pinondohan ni Lawrence Stroll, ama ng kanyang teammate na si Lance.

Hindi man kahanga-hanga ang kanilang mga kamakailang resulta, naging sapat pa rin ang potensyal ng proyekto ng Aston upang mahikayat si Adrian Newey mula sa Red Bull — ang design genius na nasa likod ng 13 titulo sa F1.

Ayon kay Alonso, nakatuon si Newey sa malaking pagbabago sa teknikal na panuntunan ng F1 sa 2026.

“’Yung sasakyan lang ng 2026 ang tinatrabaho niya, at suportado ko ’yon,” wika ni Alonso.

“Gusto kong maranasan magmaneho ng sasakyang dinisenyo ni Adrian. Pero hindi na ako aabot ng singkwenta.

“Pagkatapos ng 2026, ewan ko pa — taon-taon kong susuriin kung gaano pa ako kaganado. Pero ngayon, mataas pa ang motivation ko. Gawin natin ’to hanggang 2026, tapos saka tayo mag-usap ulit kung ano ang makakabuti para sa team.”

Papunta na sa kanyang ika-51 karera sa ilalim ng Aston Martin mula nang lumipat mula Alpine noong 2023, ipinahayag ni Alonso ang pasasalamat sa naging “hindi kapani-paniwalang paglalakbay.”

Bagamat hindi pa siya nakakakuha ng puntos ngayong season, positibo pa rin ang kanyang pananaw.