May 22 - Nagwagi si Shai Gilgeous-Alexander ng Oklahoma City Thunder bilang NBA Most Valuable Player (MVP) para sa 2024-2025 season matapos talunin si Nikola Jokic ng Denver Nuggets sa boto.

Inanunsyo ng TNT Sports ang resulta kung saan wagi si Gilgeous-Alexander sa botohan, 71-29, laban kay Jokic, isang three-time MVP. Ang award ay ibinibigay batay lamang sa regular season performance.

Pinangunahan ni Gilgeous-Alexander ang liga sa scoring na may average na 32.7 puntos kada laro, kalakip ang 6.4 assists at 5.0 rebounds. Naglaro siya ng 75 games na may hindi bababa sa 20 puntos, kabilang ang 49 na 30-point games, 13 na 40-point games, at apat na 50-point games — isang feat na huling naitala ni James Harden noong 2018-19.

Tanging isang laro lamang ngayong season ang hindi siya umabot sa 20 puntos: kontra San Antonio noong Oktubre 30, 2024 (18 points). Nakapagtala rin siya ng 72 sunod na laro na may hindi bababa sa 20 puntos — pinakamahabang streak sa isang season mula 1963-64.

Sa kabuuan, pinangunahan ni Gilgeous-Alexander ang Thunder sa best record ng liga na 68 panalo, kabilang ang league record para sa scoring margin. Siya ang ikatlong Thunder player na naging MVP, kasunod nina Kevin Durant (2013-14) at Russell Westbrook (2016-17), at pangalawang Canadian MVP pagkatapos ni Steve Nash.

Bagamat may career-best stats si Jokic (29.6 puntos, 12.7 rebounds, 10.2 assists at 34 triple-doubles), hindi ito sapat upang maagaw muli ang MVP trophy.