June 20 - Bumulaga si Alexander Bublik ng Kazakhstan kay World No. 1 Jannik Sinner para sa isang nakakagulat na 6-3, 3-6, 6-4 panalo sa ikalawang round ng Halle Open nitong Huwebes (Biyernes sa Pilipinas).

Ito ang unang laban ni Sinner mula nang matalo sa French Open finals kay Carlos Alcaraz at kauna-unahang talo niya sa isang manlalaro na nasa labas ng Top 20 simula pa noong 2023.

Magaan na tinalo ni Sinner si Bublik sa quarterfinals ng Roland Garros kamakailan, ngunit ibang kuwento ang naganap sa damuhan ng Halle habang 10 araw na lang bago ang Wimbledon.

“Nakakatuwang manalo laban sa World No. 1. Isa itong malaking accomplishment,” ani Bublik matapos ang panalo.

Bagamat lumusot si Sinner sa unang set at hindi man lang nakaharap ng break point, bumawi si Bublik sa ikalawa sa pamamagitan ng 20 winners at isang crucial break sa ika-anim na game.

Sa ikatlong set, tinapos ng 28-anyos na Kazakh ang laban sa isang napakatalas na forehand upang mabasag ang serve ni Sinner.

“Alam kong kailangan ko lang manatiling consistent sa aking serve, at iyon ang ginawa ko,” dagdag pa ni Bublik.

Sa quarterfinals, makakaharap ni Bublik si Tomas Machac ng Czech Republic.

Samantala, umabante rin sa quarters si World No. 3 Alexander Zverev matapos talunin si Lorenzo Sonego ng Italy, 3-6, 6-4, 7-6 (7/2). Ito ang ikalimang sunod na panalo ni Zverev kontra Sonego, kabilang ang isa noong parehong yugto ng parehong torneo noong nakaraang taon.

Nakalusot din sa quarters si Tomas Martin Etcheverry ng Argentina matapos ang tatlong-oras na bakbakan laban kay Andrey Rublev, 6-3, 6-7 (4), 7-6 (6), kung saan sinagip niya ang dalawang match point.