July 14 - Pinadapa ng World No. 2 Australia ang Gilas Pilipinas women’s team sa iskor na 115-39, sa isang nakakabinging pagkatalo ng 76 puntos sa pagbubukas ng kampanya ng Pilipinas sa FIBA Women’s Asia Cup kagabi sa China.

Naungusan agad ng 17 puntos sa unang quarter, hindi na nakabawi ang Gilas habang nagpaulan ng puntos ang mga Australiano mula simula hanggang dulo.

Bumida si Miela Goodchild para sa Australia na may 19 puntos sa 7-of-10 shooting, habang nag-ambag din sina Sara Blicavs (17) at Chloe Bibby (16) sa opensa ng Oceania powerhouse.

Sa halftime pa lang, wasak na ang depensa ng Pilipinas at binura ang lahat ng momentum matapos payagan ang Australia na umiskor ng 31-14 sa opening frame. Lalong lumala sa ikaapat na yugto, kung saan dalawang puntos lang ang naitala ng Gilas—lahat ay mula kay Jack Animam na noon lang nakapuntos.

Anim na manlalaro ng Australia ang nagtapos ng may double digits, habang walang ni isang Gilas player ang umabot ng sampu. Pinangunahan ni Vanessa de Jesus ang Pilipinas na may siyam na puntos at tatlong rebounds, habang tig-walo naman sina Naomi Panganiban at Kent Pastrana.

Ito na ang pinakamalaking margin ng pagkatalo sa tournament sa ngayon.

Susubukan ng Gilas na bumawi kontra World No. 9 Japan ngayong Lunes ng alas-7:30 ng gabi — isang matinding hamon muli para sa national squad.