Batangas - Nasugatan si Jonas Tibayan ng Mindoro Tamaraws matapos suntukin ng forward ng GenSan Warriors na si Michole Sorela sa kanilang MPBL game sa Batangas City Coliseum kagabi.

Sa kalagitnaan ng laro, bigla umanong tinamaan ng malakas na suntok ni Sorela si Tibayan, na agad bumagsak sa sahig at nawalan ng malay. Ayon sa initial medical report, nagtamo si Tibayan ng basag na panga at concussion, at agad siyang dinala sa ospital para sumailalim sa karagdagang pagsusuri at gamutan.

Matapos ang insidente, kaagad na na-eject si Sorela mula sa laro. Inaasahang haharap siya sa mabigat na parusa mula sa MPBL Technical Committee, at posibleng aksyon mula sa Games and Amusements Board (GAB) na may kapangyarihang magpataw ng suspensyon o tanggalin ang lisensya ng isang professional player.

Maraming fans at netizens ang nagpahayag ng pagkadismaya sa social media, na nananawagan ng mas mabigat na disciplinary action, kabilang ang posibleng lifetime ban para kay Sorela.

Ayon sa mga patakaran ng MPBL, ang anumang anyo ng physical assault sa kapwa manlalaro ay itinuturing na “flagrant misconduct” at may kaakibat na multa, suspensyon, at iba pang disciplinary measures. Depende sa bigat ng insidente at pinsalang natamo ng biktima, maaaring patawan si Sorela ng pangmatagalang suspensyon o tuluyang ipagbawal na maglaro sa liga.

Ang insidente ay naganap sa gitna ng mainit na laban sa pagitan ng Mindoro at GenSan, kung saan nanguna ang Tamaraws bago huminto ang laro dahil sa gulo. Ayon sa ilang ulat, wala pang malinaw na paliwanag mula sa kampo ni Sorela tungkol sa nangyari.

Sa ngayon, patuloy na nagpapagaling si Tibayan habang hinihintay ang opisyal na pahayag mula sa kanyang koponan at sa liga.

Larawan mula sa MPBL