Agosto 27, 2025 - Isang bihirang dual autograph trading card nina basketball legends Michael Jordan at Kobe Bryant ang nagbenta sa rekord na $12.932 milyon (halos ₱760 milyon) sa isang auction ng Heritage Auctions nitong Agosto 24.

Ang card, mula sa 2007–08 Upper Deck Exquisite Collection Dual Logoman Autographs, ay may kasamang pirma ng dalawang NBA icons at bahagi ng kanilang game-worn jersey patches. Tanging isang kopya lamang nito ang ginawa, dahilan para maituring itong “holy grail” ng mga kolektor.

Ayon kay Heritage Auctions sports director Chris Ivy, ang card na ito ang pinakamataas na lebel ng modernong sports cards:

 “Ito na ang pinnacle para sa mga collectors. Walang katulad sa kumbinasyon nina Jordan at Bryant.”

Sa halagang nakuha nito, nalampasan ng card ang dating record-holder na 1952 Topps Mickey Mantle card na naibenta sa $12.6 milyon noong 2022. Sa kabuuang sports memorabilia naman, pumangalawa ito sa pinakamahal na nabenta, kasunod ng Babe Ruth 1932 World Series ‘called shot’ jersey na umabot sa $24.12 milyon noong 2024.

Ang pagbebenta ay nagtapos sa mismong ika-47 kaarawan ni Kobe Bryant, bagay na nagdagdag ng sentimental na halaga sa collectors.

Binili ito ng isang grupo ng investors na kinabibilangan nina Kevin O’Leary, TV personality at negosyante, kasama si Matt Allen (Shyne150) at si Paul Warshaw.

Para sa maraming tagahanga at kolektor, simbolo ang card na ito hindi lamang ng kasaysayan ng NBA, kundi ng walang kapantay na pamana nina Michael Jordan at ng yumaong Kobe Bryant.