Senator Risa Hontiveros nanawagan na i-realign ang bahagi ng P255 billion flood control funds sa proposed 2026 budget para matugunan ang malaking kakulangan sa kapasidad ng public hospitals. Layunin nito na punan ang 90,375-bed gap sa buong bansa.

Lumabas sa Department of Health (DOH) na sa 118,528 beds na nakasaad sa batas, 28,153 lang ang aktwal na available sa mga ospital.

“Sobrang layo ng agwat! Imbes na ma-ghost na naman tayo sa flood control, mas mabuting ibigay na lang sa DOH ang pondo para mapaliit ang bed capacity gap. Tigilan na ang siksikan,” ani Hontiveros, chair ng Senate Committee on Health and Demography, sa isang committee hearing.

Ayon sa senador, kailangan na ng catch-up plan para sa hospital beds. “Pati pala sa mga hospital beds, kailangan ng catch up plan. It’s about time na tigilan na ang Filipino patients sa pakikipagkompetensya para sa space at care,” dagdag niya.

Hontiveros umaasa na mabilis na ma-realign ng Congress ang bahagi ng flood control funds para sa hospital capacity. Binanggit niya na kasama sa “menu” ng Malacañang ang DOH programs na puwedeng paglaanan ng pondo, tulad ng Health Facilities Enhancement Program (HFEP), pagbibigay ng gamot, at Medical Assistance to Indigent and Financially Incapacitated Patients (MAIFIP).

“Malacañang has already cleared the path. Kailangang mag-materialize itong 90,000 hospital beds—kumpleto sa equipment at health workers. Hindi yan mangyayari kung hahayaan lang natin tangayin ang pera ng taumbayan sa baha ng korapsyon habang nagsisiksikan ang dalawa o higit pa sa iisang kama sa ospital,” giit ni Hontiveros.

Pinangako rin niya na makikipagtulungan sa kapwa senador para dagdagan ang pondo sa 2026 budget para sa health reforms. “We will work very closely together na patuloy at higit pang pondohan yung mga reporma sa kalusugan. Sisiguraduhin ko na sulit ang buwis natin, kapalit ang serbisyong deserve nating lahat,” sabi niya.

Ang panawagang ito ni Hontiveros ay nagpapakita ng agarang pangangailangan na unahin ang kalusugan ng publiko, at tiyakin na bawat Filipino ay may sapat na bed, equipment, at healthcare workers sa ospital.