Papasok na ang Coca-Cola sa prebiotic soda market sa paglulunsad ng bago nitong brand na Simply Pop, na direktang makikipagkumpetensya sa lumalakas na mga brand gaya ng Olipop at Poppi. Ang bagong inumin ay magiging available simula huling bahagi ng Pebrero sa piling mga rehiyon, kabilang ang West Coast at Southeast ng U.S.

Sa nakalipas na dalawang dekada, bumaba ang konsumo ng soda sa U.S. dahil sa mga alalahaning pangkalusugan at sa pagdami ng mga alternatibong inumin tulad ng cold brew, energy drinks, at flavored water. Gayunpaman, sa nakalipas na limang taon, lumakas ang kasikatan ng mga prebiotic soda dahil sa tagumpay ng mga brand tulad ng Olipop at Poppi.

Kamakailan, nakalikom ang Olipop ng $50 milyon sa halagang $1.85 bilyong valuation, na nagpapakita ng lumalaking demand para sa mga inuming pampadali ng panunaw. Samantala, muling lumabas ang Poppi sa Super Bowl sa ikalawang sunod na taon, gumastos ng hanggang $8 milyon upang maabot ang record-breaking na audience ng laro. Ayon sa Euromonitor International, ang kategorya ng digestive health soft drinks sa U.S. ay lumago mula $197 milyon noong 2020 patungong humigit-kumulang $440 milyon noong 2024. Sa kabila ng paglago, maliit pa rin ito kumpara sa bilyun-bilyong dolyar na halaga ng soda industry.

Ang unang linya ng produkto ng Simply Pop ay magkakaroon ng mga prutas na lasa, na inspirasyon ng Simply juice brand ng Coca-Cola, kabilang ang pineapple mango, lime, strawberry, fruit punch, at citrus punch.

"Nakinig kami sa mga mamimili. Gustong-gusto nila ang ganitong produkto, hinahanap nila ang masarap na panlasa, at alam namin kung paano ito ihatid sa Simply at Coke," ayon kay Becca Kerr, CEO ng Coca-Cola North America Nutrition na namumuno sa Simply at Fairlife Brands.

Ayon sa Coca-Cola, walang idinagdag na asukal ang Simply Pop at binubuo ito ng 25% hanggang 30% tunay na katas ng prutas. Mayroon din itong bitamina C at zinc, na kilalang pampalakas ng resistensya. Ang bawat lata ay may anim na gramo ng prebiotic fiber—tatlong beses ang dami kumpara sa Poppi ngunit mas mababa kaysa sa siyam na gramo ng Olipop.

Sumikat ang prebiotics dahil sa sinasabing kakayahan nitong pagandahin ang "kalusugan ng bituka" sa pamamagitan ng pagpaparami ng mabubuting bacteria sa digestive system. Gayunpaman, hindi pa tiyak ang siyentipikong ebidensya na sumusuporta sa mga benepisyong ito.

"Napansin naming malakas ang interes ng mga mas nakababatang mamimili, tulad ng millennial at Gen Z, sa ganitong uri ng produkto," ani Kerr. "Nakikita rin namin ang interes mula sa mga multicultural na mamimili."

Sa kabila ng paglago ng merkado, patuloy ang pagsusuri sa mga health claims.

Sa kasalukuyan, nasa settlement talks ang Poppi kaugnay ng kasong isinampa noong Mayo na kumukwestyon sa marketing nito, na sinasabing hindi kasing epektibo para sa kalusugan ng bituka ang kanilang mga produkto gaya ng inaangkin.

Matagal nang binabantayan ng Coca-Cola ang prebiotic soda market, ayon kay Kerr. Noong 2023, isiniwalat ni Ben Goodwin, CEO at co-founder ng Olipop, na parehong Coca-Cola at PepsiCo ang nagpahayag ng interes sa pagbili ng kumpanya. Iniulat din na plano ng PepsiCo na ilunsad ang sarili nitong prebiotic soda sa 2025.

Bagama’t baguhan sa prebiotic soda market, may malinaw na kalamangan ang Coca-Cola, kabilang ang mahigit isang siglo nitong dominasyon sa soda industry, malawakang marketing, at matatag na distribution network. Noong 2024, nagtala ito ng $47 bilyong kita, kumpara sa tinatayang $400 milyong kita ng Olipop.

Gayunpaman, ilang beses nang nabigo ang Coca-Cola sa pagsubok sa mga bagong inumin. Noong 2024, inalis nito sa merkado ang Coke Spiced ilang buwan matapos ideklarang permanenteng produkto. Noong 2023 naman, binawasan nito ang distribusyon ng Aha sparkling water matapos hindi makuha ang interes ng mga mamimili.

Mananatiling isang malaking tanong kung makakakuha ng sapat na tagasuporta ang Simply Pop sa masikip na kompetisyon sa prebiotic soda market.

Larawan: NBC News