QUEZON CITY, Philippines — Nagsusumikap ang Pilipinas na masiguro ang mas magandang kalakaran para sa pag-export ng saging patungong Japan, ang pinakamalaking merkado nito, dahil sa banta ng mataas na taripa sa kompetitibong katayuan ng industriya. Kamakailan, pinangunahan ni Agriculture Secretary Francisco Tiu Laurel Jr. ang mga talakayan sa Tokyo kasama ang mga opisyal at importers ng Japan upang tugunan ang isyu, na binigyang-diin ang pangangailangan ng pagbabawas ng taripa para masuportahan ang paglago ng sektor at libu-libong magsasakang Pilipino.

Ayon sa datos, ang Japan ay nag-aangkat ng mahigit 1 milyong metrikong tonelada ng saging taun-taon, kung saan ang Pilipinas ang nagkakaloob ng tatlo sa bawat apat na saging na kinokonsumo roon. Gayunpaman, sa ilalim ng Japan-Philippines Economic Partnership Agreement (JPEPA), 18% ang taripa mula Abril hanggang Setyembre at 8% mula Oktubre hanggang Marso. 

Sa kabilang banda, ang Japan ay nagbibigay ng zero o mas mababang taripa sa saging mula sa Cambodia, Laos, Mexico, at Vietnam, na nagdudulot ng malaking disadvantage para sa mga exporter ng Pilipinas.

“The banana industry is a lifeline for thousands of farmers and workers, especially in Mindanao, where it serves as a major economic pillar,” ani Tiu Laurel. “To sustain and expand this industry, we must push for tariff reductions on our bananas. This will not only attract greater investment in banana production but also drive poverty alleviation, job creation, and security in Mindanao.” 

(Ang industriya ng saging ay lifeline ng libu-libong magsasaka at manggagawa, lalo na sa Mindanao, kung saan ito ay isang pangunahing haligi ng ekonomiya. Upang masuportahan at mapalago ang industriyang ito, kailangan nating itulak ang pagbabawas ng taripa sa ating mga saging. Hindi lamang ito makakalikha ng mas malaking pamumuhunan sa produksyon ng saging kundi makakatulong din sa pagpapagaan ng kahirapan, paglikha ng trabaho, at seguridad sa Mindanao.”

Kasama ang mga kinatawan mula sa industriya ng saging, nakipagpulong ang delegasyon ng Pilipinas sa mga Japanese importers at opisyal upang talakayin ang mga pamantayan sa kalidad, isyu sa taripa, at paraan para mapalakas ang export. 

Ayon sa Japan Banana Importers Association, kabilang sa mga hamon ay ang Fusarium wilt, isang sakit sa lupa na nakakaapekto sa produksyon. Tiniyak ni Tiu Laurel ang patuloy na suporta sa mga growers upang labanan ang isyu, habang binibigyang-pansin din ang pagsisikap ng Pilipinas na palakasin ang ugnayan sa kalakalan sa Japan.

Sa kanyang pagbisita, nakipagkita rin si Tiu Laurel kay Japan’s State Minister of Agriculture Hirofumi Takinami at Liberal Democratic Party Secretary-General Hiroshi Moriyama upang tuklasin ang posibleng rebisyon ng JPEPA.

“This official trip mainly aims to address the pressing issue of declining competitiveness of our Philippine bananas in Japan, which is of utmost importance to the DA,” aniya. “We hope to come up with a common solution with stakeholders to address the tariff issue and negotiate mutually beneficial terms with the Japanese government under the JPEPA.”

(Ang opisyal na pagbisitang ito ay naglalayong tugunan ang isyu ng pagbaba ng kompetitibong katayuan ng ating mga saging sa Japan, na napakahalaga sa DA. Nais nating makabuo ng solusyon kasama ang mga stakeholders upang matugunan ang isyu sa taripa at makipagnegosasyon sa gobyerno ng Japan para sa mas makatarungang tuntunin sa ilalim ng JPEPA.)

Ang pagsisikap ng Pilipinas para sa mas patas na kalakaran ay nagpapakita ng kahalagahan ng industriya ng saging, na nagbibigay ng mahigit $1 bilyon taun-taon at sumusuporta sa mahigit 700,000 na kabuhayan. 

Habang patuloy ang negosasyon, nananatiling positibo ang mga stakeholders na makakamit ang isang kasunduang kapaki-pakinabang sa parehong bansa at masisiguro ang sustainable na kinabukasan ng industriyang ito.

(Larawan: Philippine News Agency)