ABRIL 14, 2025 — Magpapatupad ang gobyerno ng bagong programa para tulungan ang mga magsasaka na mapababa ang financial stress habang pinapataas ang kanilang productivity. Inilunsad sa Sarangani ang Agri-Puhunan at Pantawid Program (APP), na nagbibigay ng murang pautang, direktang cash assistance, at farm equipment para suportahan ang mga lokal na magsasaka.

Maaaring humiram ang mga magsasaka ng hanggang ₱60,000 bawat planting season sa 2% annual interest lang — mas mababa kumpara sa karaniwang loan rates. Tiniyak ni President Ferdinand Marcos Jr., na pangunahing naglunsad ng programa, na hindi na kailangang mag-alala ang mga magsasaka sa mataas na interes.

"Simula ngayon, hindi niyo na po kailangan alalahanin ang mataas na tubo na kaakibat ng inyong hinihiram," aniya.

Mas pinaigi din ang pagbabayad: Pwede bayaran ang loan sa pamamagitan ng pagbenta ng ani sa National Food Authority o sa mga DA-approved cooperatives.

Hindi lang diyan nagtatapos ang suporta. Para matulungan sa pang-araw-araw na gastusin, makakatanggap ang mga benepisyaryo ng ₱8,000 bawat buwan sa loob ng apat na buwan — mula planting hanggang harvest.

"Sa panahon naman ng pagtanim hanggang sa pagaani, makakatanggap din kayo ng tulong pantawid na nagkakahalaga ng P8,000 tuwing unang linggo sa loob ng apat na buwan," dagdag ni Marcos.

Kasama rin sa programa ang Intervention Monitoring Cards, na pwedeng gamitin ng mga magsasaka para bumili ng binhi, pataba, at iba pang pangangailangan sa accredited sellers. Para mas mapabilis ang trabaho, magkakaloob ang gobyerno ng farm machinery tulad ng mobile disinfection trucks at forage choppers para mabawasan ang labor cost at tumaas ang ani.

(Larawan: iStock)