MAYO 14, 2025 — Aalisin na ng Department of Agriculture (DA) ang maximum suggested retail price (MSRP) para sa baboy habang naghahanap ng paraan para balansehin ang kakulangan sa supply at tumataas na demand. Ayon sa mga opisyal, may bagong pricing mechanism na pinag-aaralan para mapatatag ang presyo nang hindi sinisira ang merkado.

Kinumpirma ito ni Agriculture Undersecretary Constante Palabrica, na nagsabing, “I’ll give you a hint: it will be lifted but while we are studying on how we can implement the MSRP. It’s called one step back and two steps forward.”

(Bibigyan ko kayo ng hint: tatanggalin muna ito habang pinag-aaralan pa kung paano ipatutupad ang MSRP. Ito’y tinatawag na isang hakbang pabalik, dalawang hakbang pasulong.)

Dumating ang desisyon matapos ang ilang buwan ng hamon, kabilang ang mga outbreak ng African swine fever (ASF) at mas mataas na demand dahil sa eleksyon.

“Basically, like what I said earlier, it’s the law of supply and demand,” dagdag ni Palabrica. “Because of the loss of hogs due to ASF and there is so much demand because of the present election, it’s difficult to implement.”

(“Sa madaling salita, tulad ng sinabi ko, batas ng supply at demand ito. Dahil sa pagkalugi ng mga baboy dahil sa ASF at napakataas ng demand dahil sa eleksyon ngayon, mahirap ipatupad.”)

Noon, itinakda ng DA ang price ceiling sa P380 kada kilo para sa pork liempo at P350 para sa kasim at pigue. Pero dahil sa hindi pantay na supply at problema sa pagpapatupad, naging hindi epektibo ang polisiya, kaya naghanap na ng bagong stratehiya.

Bagama’t hindi pa malinaw ang detalye, iginiit ng ahensya na ang pansamantalang pag-alis sa MSRP ay magbibigay-daan sa mas sustainable na solusyon. Pero maaaring makaranas muna ng pagtaas ng presyo ang mga mamimili habang nag-a-adjust ang merkado. Hindi pa inaanunsyo ng DA ang timeline para sa bagong patakaran.

(Larawan: Asian Agribiz)