HUNYO 6, 2025 — Inilabas ng Philippine Statistics Authority (PSA) ang pinakabagong Labor Force Survey (LFS) na nagpapakita kung aling mga propesyon ang kumikita ng pinakamalaki — at pinakakaunti — sa arawang sahod noong Abril 2025.

Nangunguna ang mga manager, na kumikita ng average na P1,387 bawat araw, mas mataas kaysa sa P1,356 noong 2024. Kasunod nila ang mga miyembro ng armed forces, na tumatanggap ng P1,321 araw-araw, malaking pagtaas mula sa P1,185 noong nakaraang taon.

Pangatlo ang mga propesyonal tulad ng siyentipiko, abogado, at artista, na may sahod na P1,214 bawat araw, samantalang P873 naman ang kinikita ng mga technician at associate professional. P747 naman ang sahod ng mga clerical support worker.

Sa kabilang dulo, pinakamababa ang kinikita ng mga elementary occupation tulad ng cleaners at street vendor — P428 lamang bawat araw. P486 ang sahod ng skilled agricultural workers, habang P552 naman ang service at sales workers.

Inilabas ang datos na ito habang pinagtatalunan sa Kongreso ang panukalang P200 dagdag sa minimum wage para sa mga pribadong manggagawa. Aprubado na ito sa House, pero tutol ang mga business group dahil sa banta ng inflation. P100 na lang ang gusto ng Senate, at mayroong hanggang Hunyo 13 para pagkasunduan ng dalawang kapulungan ang final na version.

Hindi pa ipinapahayag ng Malacañang ang posisyon ni Pangulong Marcos, at sinabing pinag-aaralan pa ang epekto nito sa ekonomiya. Kapag hindi nagkasundo, mawawalang bisa ang panukala at kailangan itong muling i-file sa susunod na termino.

(Larawan: Philippine News Agency)