Manila - Inilunsad ng Philippine Airlines (PAL) ang kanilang Ultimate Seat Sale 2025 kung saan maaaring makakuha ng murang pamasahe para sa mga domestic at international flights.

Ayon sa PAL, bukas ang booking period mula Agosto 18 hanggang Agosto 31, 2025, at maaaring gamitin ang mga tiket hanggang Enero 14, 2026.

Nag-aalok ang airline ng ₱189 one-way fare para sa mga domestic flight, habang nagsisimula naman sa $59 roundtrip ang pamasahe para sa international flights.

Bukod sa promo, inanunsyo rin ng PAL ang kanilang magandang financial performance. Sa ikalawang quarter ng taon, nakapagtala sila ng 15 sunod-sunod na quarter na may kita, kabilang ang $60 milyon net income, mas mataas ng 48% kumpara sa parehong panahon noong nakaraang taon. Tumaas din ang kanilang revenue ng 6% o umabot sa $831 milyon.

Kasabay nito, naghahanda rin ang PAL sa pagpapalawak ng kanilang fleet. Inaasahang darating ang kanilang unang Airbus A350-1000 bago matapos ang taon, na susundan ng walo pang kaparehong modelo at 13 A321neo aircraft simula 2026.

Dagdag pa rito, magkakaroon ng 18 retrofitted A321ceo aircraft na may bagong cabin, mas maayos na in-flight entertainment system, at Wi-Fi connectivity bago matapos ang Oktubre 2025.