NOBYEMBRE 17, 2025 — Nilunsad na ng Philippine Airlines (PAL) ang kanilang year-end seat sale ngayong Nobyembre, tampok ang pinakamababang pamasahe para sa mga biyaheng lokal at internasyonal bago sumapit ang 2026.

Simula Nobyembre 17 hanggang 30, 2025, maaaring makakuha ang mga pasahero ng one-way economy base fare sa halagang ₱149 para sa mga domestic flight. Para naman sa mga international roundtrip, nakatakdang ibenta ang Economy Supersaver base fares mula $60 mula Maynila at $59 mula Cebu. Hindi kasama rito ang check-in baggage.

Ang promo ay agad na epektibo sa parehong petsa ng pagbubukas, kaya’t puwedeng magplano ang mga biyahero ng holiday trips o maagang lakad para sa susunod na taon.

Ayon kay Alvin Miranda, Vice President for Marketing ng PAL, “As the year winds down, many of us look for ways to reward ourselves for everything we’ve accomplished, whether big or small. The Year-End Seat Sale is our way of joining that celebration with an invitation to mark the season by turning well-deserved dreams into real journeys and meaningful memories.” 

(Habang papalapit ang pagtatapos ng taon, marami sa atin ang naghahanap ng paraan para gantimpalaan ang sarili sa lahat ng ating nagawa, malaki man o maliit. Ang Year-End Seat Sale ay paraan namin para makiisa sa pagdiriwang na ito, na nag-aanyaya na gawing tunay na paglalakbay at makabuluhang alaala ang mga pinapangarap.)

Sa pamamagitan ng naturang promo, binibigyan ng PAL ng pagkakataon ang mga Pilipino at dayuhan na makapaglakbay nang mas abot-kaya, lalo na sa panahon ng kapaskuhan kung kailan mataas ang demand sa biyahe.

Ang hakbang na ito ay inaasahang magpapalakas sa turismo at magbibigay ng dagdag na sigla sa mga pasahero na naghahanap ng murang pamasahe para sa kanilang mga bakasyon o bagong taon na plano.

Sa pagbubukas ng sale, inaasahan ang dagsa ng bookings mula sa mga naghihintay ng ganitong pagkakataon taon-taon.

(Larawan: Philippine Airlines | Facebook)