NOBYEMBRE 17, 2025 — Nagbago ang ihip ng hangin sa usapin ng Light Rail Manila Corp. (LRMC) matapos ang matinding pahayag ni Manuel V. Pangilinan, chairman ng Metro Pacific Investments Corp. (MPIC), na handa na itong kumalas sa proyekto dahil sa dekada ng lugi at hindi natupad na obligasyon ng pamahalaan. Ang banta ng pag-alis ay agad nag-udyok sa gobyerno na makipag-usap upang ayusin ang utang at kontrata ng konsesyon.

Ayon kay LRMC President at CEO Enrico Benipayo, mabilis ang naging tugon ng Department of Transportation (DOTr) matapos ang babala ni Pangilinan. 

“Mr. Chairman, your statement a bit pushed DOTr to act,” ani Benipayo. “The following day, I received a message coming from the DOTr (acting) Secretary (Giovanni Z. Lopez) himself. I cannot disclose at this point in time, but what I can say is it’s something positive.” 

(Mr. Chairman, ang inyong pahayag ay bahagyang nagtulak sa DOTr na kumilos. Kinabukasan, nakatanggap ako ng mensahe mula mismo sa DOTr acting Secretary Giovanni Z. Lopez. Hindi ko pa maaaring ibunyag sa ngayon, pero masasabi kong positibo ito.)

Matagal nang idinadaing ng LRMC ang mabigat na pasaning pinansyal dahil sa hindi naibigay na bayad ng pamahalaan at matagal na pagkaantala sa fare adjustments. Sa loob ng sampung taon, lumobo ang gastos sa financing habang nananatiling limitado ang kita.

Si Pangilinan, sa hiwalay na panayam, ay muling iginiit ang prinsipyo ng Public-Private Partnership (PPP). 

“It should be a government thing, if they do not want to give tariff hikes. The basic tenet of PPP is you’re asking for other people’s money to build a particular project,” aniya.

(Dapat ay responsibilidad ng gobyerno kung ayaw nilang magpatupad ng dagdag-pasahe. Ang pangunahing prinsipyo ng PPP ay humihiram ka ng pera ng ibang tao para magpatayo ng proyekto.)

Dagdag pa niya, “If you’re not willing to [increase in rates], then use your own money. Then, you don’t have to worry about these returns and calculations about tariffs and everything else.” 

(Kung ayaw ninyong magtaas ng pasahe, gamitin ninyo ang sarili ninyong pera. Sa ganitong paraan, hindi na ninyo kailangang mag-alala sa kita at kalkulasyon ng taripa.)

Bukod sa MPIC, nagpahayag din ang Ayala Corp. — na may 35% na bahagi sa LRMC — ng interes na kumalas. Ang sitwasyong ito ay naglagay sa proyekto sa alanganin, lalo’t ang dalawang pangunahing shareholders ay parehong nagdadalawang-isip.

Gayunman, nananatiling umaasa si Benipayo na mapipigilan ang pag-alis ng MPIC.

“I hope I'll be able to convince our chairman. We're meeting him, I think, next week. As we did with our other shareholders like Ayala and Sumitomo, I think both of them have bought into the plan to turn the corner for LRMC,” aniya. 

(Umaasa akong makukumbinsi ko ang aming chairman. Magkikita kami sa susunod na linggo. Tulad ng ginawa namin sa iba pang shareholders gaya ng Ayala at Sumitomo, sa tingin ko pumayag na sila sa plano para makabawi ang LRMC.)

Sa ilalim ng kasalukuyang administrasyon, nakamit ng LRMC ang kauna-unahang fare hike matapos ang mahabang panahon ng pagtutol ng publiko. Bukod dito, kinilala na ng DOTr at Department of Finance ang utang ng gobyerno sa kumpanya at nangakong magbabayad ng malaking bahagi sa mga darating na buwan.

Upang masiguro ang pangmatagalang viability ng proyekto, isinusulong ng LRMC ang “rebalancing” ng kasunduan. Kasama rito ang panukalang palawigin ang 32-taong konsesyon ng karagdagang 18 taon, para umabot sa 50 taon, at iba pang pagbabago upang maibalik ang katayuang pinansyal na naantala ng mga obligasyong hindi natupad.

(Larawan: Light Rail Manila Corporation | Facebook)