HULYO 6, 2025 — Makasaysayang pangyayari ang naganap noong Sabado nang lumangoy ang mga Parisian at turista sa Seine — una ito sa loob ng mahigit 100 taon. Dating itinuturing na delikado ang ilog, pero naging ligtas na ito para sa paglangoy matapos ang malawakang paglilinis para sa 2024 Olympics.

Magbubukas ang tatlong swimming zones sa gitna ng Paris, na magpapahintulot sa hanggang 1,000 katao araw-araw hanggang Agosto 31. Naging posible ito dahil sa mga pag-upgrade sa imprastraktura, tulad ng pinalawak na sewage system, modernong treatment plants, at mga bagong storage tanks para sa stormwater.

Bagamat naantala ang ilang Olympic events noong nakaraang taon dahil sa paiba-ibang panahon, napatunayan naman ng swimming at triathlon competitions na ligtas na ang tubig. Araw-araw itong tinetest ng mga awtoridad, at may flag system para sa babala: berde para sa ligtas, pula para sa ipinagbabawal.

Bukod sa Paris, 14 pang swimming areas sa Seine at Marne rivers ang bubuksan, at dalawa rito ay operational na simula pa noong Hunyo. Hindi lamang ito pagbabalik ng tradisyon kundi patunay sa pagsisikap na linisin ang mga ilog sa lungsod.

Tuwang-tuwa ang mga lokal at turista sa muling pagbubukas, na itinuturing na tagumpay para sa lungsod at kalikasan. Para sa marami, ang dating imposibleng paglangoy sa ilalim ng Eiffel Tower, ngayon ay isa nang realidad.

(Larawan: Yahoo)