WASHINGTON, D.C. — Inilabas ng administrasyong Trump ang isang panukalang regulasyon na layong limitahan ang tagal ng pananatili ng mga dayuhang estudyante, kalahok sa cultural exchange programs, at mga miyembro ng foreign media sa Estados Unidos.

Sa ilalim ng bagong panukala, ang mga visa holders na nasa ilalim ng F (student), J (exchange visitor), at I (media) categories ay bibigyan ng tiyak na tagal ng pananatili sa halip na “duration of status” na nakabatay sa kanilang aktwal na programa. Ayon sa dokumento mula sa Department of Homeland Security (DHS), ang mga sumusunod na limitasyon ay ipatutupad:

• F at J visas: Maximum na apat (4) na taon ng pananatili

• I visa para sa media: Hanggang 240 araw, habang ang mga Chinese nationals ay limitado sa 90 araw

Ayon sa DHS, layunin ng panukala na “better monitor and oversee” ang mga visa holders habang nasa loob ng bansa. Bagama’t pinapayagan pa rin ang aplikasyon para sa extension, ang bagong patakaran ay magdudulot ng mas mahigpit na pagsusuri sa mga dayuhang bisita.

Ang hakbang ay bahagi ng mas malawak na kampanya ng administrasyon upang higpitan ang legal na imigrasyon. Noong 2020, isang katulad na panukala ang inilabas ngunit hindi naipatupad matapos itong bawiin ng administrasyong Biden noong 2021.

Ayon sa datos ng U.S. Department of State, may tinatayang 1.6 milyong internasyonal na estudyante ang nasa U.S. noong 2024, habang nasa 355,000 ang exchange visitors at 13,000 ang media visa holders.

Samantala, inanunsyo rin ng U.S. Citizenship and Immigration Services (USCIS) noong Agosto 22 ang muling pagsasagawa ng field visits sa mga aplikante ng citizenship upang beripikahin ang kanilang “residency, moral character, and commitment to American ideals.”

Ang publiko ay binibigyan ng 30 araw upang magbigay ng komento sa panukala bago ito tuluyang maisabatas.

Ang mga grupo tulad ng NAFSA (Association of International Educators) ay nagpahayag ng pagtutol sa panukala, na ayon sa kanila ay maaaring magdulot ng pangamba at kawalang-katiyakan sa mga dayuhang estudyante at propesyonal.